Yaşadığımız Sədan kəndi Siyəzən rayon mərkəzindən 8 kilometrlik məsafədə yerləşir. Kəndimizin sakinləri təsərrüfatla məşğul olmaqla yanaşı, mədəni-kütləvi tədbirlərdə də fəal iştirak edirlər. Bunun üçün Sədanda klub, kitabxana, mədəniyyət evi və digər ictimai məkanlar fəaliyyət göstərir.
Bir müddət əvvəl camaat kənddə idman meydançasının salınması barədə yerli icra orqanlarına müraciət etdi. Çox keçmədən mütəxəssislər gələrək kənddə minifutbol meydançasının inşasına qərar verdilər. Qısa vaxtda eni 25, uzunluğu 45 metr olan minifutbol meydançası quruldu. Meydança dörd tərəfdən hündürlüyü 5 metr olan dəmir çərçivə ilə əhatələnib. Süni örtük və ləvazimatların saxlanılması üçün meydançanın yanında anbar da inşa edilib.
Onu da bildirim ki, biz Çarxana, Müşkülqazma, Sağolcan, Eynibulaq, Meşrif, Qozağacı, Daşlı Calğan kəndləri ilə qonşuyuq. Ona görə də futbol meydançamızdan sədanlılarla yanaşı, həmin kəndlərin sakinləri də istifadə edirlər.
Ümid edirik ki, gələcəkdə meydançamızda püxtələşən və bərkiyən həvəskar futbolçular ölkə idmanına töhfə verə biləcəklər. Çünki böyük idmançılar kiçik meydançalarda yetişir.
İsmayıl MURADZADƏ,
Siyəzən rayonunun Sədan kənd sakini
