ABŞ Müdafiə Nazirliyi Qrenlandiyaya nəzarəti Şimali Amerikada hərbi əməliyyatlara cavabdeh olan Şimal Komandanlığına verməyi planlaşdırır.
Publika.az xəbər verir ki, bu barədə “Politico” Pentaqonun nümayəndəsinə və planla tanış olan iki nəfərə istinadən yazıb.
Qrenlandiya, Danimarka və Farer adaları kimi, hazırda ABŞ-ın Avropa Komandanlığının yurisdiksiyasındadır. Ancaq həftənin əvvəlində bu dəyişə bilər: “Coğrafi nöqteyi-nəzərdən bu addım müəyyən məna kəsb edir. Lakin siyasi baxımdan bu, şübhəsiz ki, Avropanı narahat edəcək”.
Nəşrin məlumatına görə, yurisdiksiyada dəyişiklik Pentaqonun silahlı qüvvələrin altı coğrafi komandirinin məsuliyyət sahələrini müəyyən edən Vahid Komandanlıq Planına yenidən baxılması çərçivəsində baş verir.
Qərar Qrenlandiyada əlavə Qızıl Qübbə radarlarının, genişlənmiş müşahidə sensorlar şəbəkəsinin yerləşdirilməsi və adanın ABŞ və Kanadanın regional müdafiə planlarına daha yaxşı inteqrasiyası üçün yol açır.
Eyni zamanda, bu addım Pentaqon və Ağ Evdə siyasi müzakirələrdə adanın prioritetliyinə aid məsələlərdə Qrenlandiyanı Danimarkadan faktiki olaraq ayıracaq.
Xatırladaq ki, bu il ABŞ, Danimarka və Qrenlandiya arasında Donald Tramp administrasiyasının ada üzərində nəzarəti bərqərar etmək istəyi səbəbindən gərginlik xeyli artıb. Tramp Qrenlandiyanı əldə etmək niyyətini bir daha bəyan edərək, bunu ABŞ-ın milli təhlükəsizliyi üçün “mütləq zərurət” adlandırıb. O, bu məqsədə çatmaq üçün hərbi və ya iqtisadi tədbirlərdən istifadə etməyi istisna etməyib.
ABŞ-ın hərəkətlərinə cavab olaraq Danimarka Arktikada mövcudluğunu gücləndirmək üçün Qrenlandiyada müdafiə xərclərini ən azı 1,5 milyard dollar artırdığını açıqladı. ABŞ-ın bu addımı NATO müttəfiqləri və Avropa İttifaqı arasında narahatlıq yaradıb. Danimarka Alyansı Arktika təhlükəsizliyinin gücləndirilməsinə cəlb etməyə və Qrenlandiyanın xarici və təhlükəsizlik siyasəti səlahiyyətlərini genişləndirməyə çalışır.
