“Helsing” şirkətinin “Centaur” süni intellekt (AI) agenti ilə təchiz edilən “Saab” şirkətinin istehsalı “Gripen E” döyüş təyyarəsinin ilk uçuş sınaqları keçirilib.
“Poliqon” “Saab”a istinadən xəbər verir ki, təyyarə keçirilən ilk üç uçuş sınağını uğurla tamamlayıb.
Bildirilib ki, “Saab” (İsveç) və “Helsing” (Almaniya) şirkətlərinin əməkdaşlığı nəticəsində süni intellekt döyüş təyyarəsinə inteqrasiya edilib.
“Saab”ın “Project Beyond” (Hüdudları Aşan Layihə) proqramı çərçivəsində 28 may tarixində baş tutan ilk uçuşla başlayan bu seriya, süni intellekt imkanlarının hərbi təyyarələrə inteqrasiyası sahəsində əhəmiyyətli bir irəliləyiş hesab olunur. Eyni zamanda, bu, “Gripen E”nin təhlükəsizlik tələblərini pozmadan proqram təminatını sürətlə yeniləyə bilmək qabiliyyətinin daha bir sübutudur.
Uçuşlar zamanı “Gripen E”nin idarəetməsi “Centaur” süni intellekt agentinə verilib və agent, görmə məsafəsindən kənar (BVR – Beyond Visual Range) döyüş şəraitində mürəkkəb manevrləri müvəffəqiyyətlə yerinə yetirərək pilotu atəş açmağa yönləndirib.
İyun 3-də keçirilən üçüncü uçuşda, “Centaur”un performansı daha dərindən test edilib. Uçuş ssenarisində “Centaur” süni intellekti ilə təchiz edilmiş “Gripen E”, real bir “Gripen D” təyyarəsinə qarşı dinamik BVR döyüş ssenariləri ilə üz-üzə gəlib. Bu zaman sensor məlumatlarından istifadə etməklə real vaxtda hədəf təqibi həyata keçirilib.
“Centaur”un adaptasiya qabiliyyəti fərqli başlanğıc məsafələri, sürətlər, aspektlər və C2 (komanda və idarəetmə) məlumatlarının deaktiv edilməsi şəraitində sınanıb.
“Saab” və “Helsing”in birgə “Project Beyond” komandası, süni intellektə əsaslanan sistemlərin gələcək təhdidlərə qarşı necə effektiv şəkildə istifadə oluna biləcəyini öyrənmək məqsədilə “Gripen E” platformasından istifadə edir. Komanda indi uçuş məlumatlarını təhlil edəcək və AI agentini daha da inkişaf etdirmək üçün təlim prosesinə davam edəcək. Bu il ərzində yeni uçuş sınaqları keçirilməsi planlaşdırılır.
Layihə, İsveçin Müdafiə Avadanlıqları İdarəsi (FMV) tərəfindən tam maliyyələşdirilir və İsveçin gələcək döyüş təyyarələri üçün konsept proqramının bir hissəsidir.
