Psixiatriya Xəstəxanasının sabiq şöbə müdirinin cəzası azaldıldı

Ali Məhkəmədə külli miqdarda rüşvət almaqda təqsirləndirilən Səhiyyə Nazirliyi 1 nömrəli Respublika Psixiatriya Xəstəxanasının sabiq şöbə müdiri Hüseyn Seyidovun barəsindəki qərardan verilən kassasiya şikayəti üzrə məhkəmə iclası başa çatıb. 

 

Pravda.az-ın əldə etdiyi məlumata görə, hakim İlkin Rəcəbovun sədrliyi ilə keçirilən prosesdə qərar elan olunub.

 

Qərara əsasən, kassasiya şikayəti qismən təmin edilib, Bakı Apellyasiya Məhkəməsinin qərarı dəyişdirilib. Belə ki, Bakı Ağır Cinayətlər Məhkəməsinin hökmü Hüseyn Seyidovun Cinayət Məcəlləsinin 308.1-ci (vəzifə səlahiyyətlərindən sui istifadə etmə) maddəsi ilə təqsirli bilinməsi və cəza təyin edilməsi, eləcə də Cinayət Məcəlləsinin 311.3.1-ci (rüşvət alma təkrar törədildikdə) və 313-cü (vəzifə saxtakarlığı) maddəsi ilə təqsirli bilinməsi hissələrində ləğv edilib. Məhkumun ittihamından Cinayət Məcəlləsinin 308.1 və 311.3.1-ci maddələri xaric olunub. Onun 8 il 3 ay müddətinə azadlıqdan məhrumetmə cəzası 5 il 3 aya endirilib.

 

Qeyd: H.Seyidov Baş prokuror yanında Korrupsiyaya qarşı Mübarizə Baş İdarəsi tərəfindən həyata keçirilmiş əməliyyat-axtarış tədbirləri zamanı saxlanılıb.

 

İttihama görə, sabiq şöbə müdiri müalicə edilmədən tibbi sənədlərdən çıxarışların verilməsi müqabilində xəstələrdən rüşvət alıb.

 

H.Seyidova qarşı Cinayət Məcəlləsinin 308.1 (vəzifə səlahiyyətlərindən sui istifadə etmə), 311.3.2 (rüşvət alma təkrar törədildikdə) və 313-cü (vəzifə saxtakarlığı) maddələri ilə ittiham irəli sürülüb.

 

Bakı Ağır Cinayətlər Məhkəməsinin hökmü ilə 8 il 3 ay müddətinə azadlıqdan məhrum edilmişdi. Bakı Apellyasiya Məhkəməsi şikayəti təmin etməmişdi.

 

Kamal Məmmədov