Fransada bir evin divarında gizlədilmiş tarixi qızıl pul kolleksiyası açıq hərracda 3,48 milyon dollardan çox qiymətə alıcı tapıb.
CNN-ə danışan Beaussant Lefèvre & Associés hərrac evi kolleksiyanın bu həftə Parisdə keçirilən açıq hərracda tamamilə satıldığını açıqlayıb.
Kolleksiya 2024-cü ildə vəfat etmiş Paul Narce adlı kolleksionerə məxsus idi. Cənub-qərbi Fransadakı kiçik bir kənddə yaşayan Narce həyatı boyu böyük sərvət yığmaq yerinə nadir qızıl pul kolleksiyası toplamağı üstün tutmuşdu.
Hərracçı Thierry Parsy bildirdi ki, Narce çox səyahət etməyib, sadə həyat sürüb və bütün pulunu bu kolleksiyaya sərf edib.
Narcenin kolleksiyasında ümumilikdə minlərlə eksponat var. Kolleksiya həm ölçüsü, həm də nadir parçalarla zənginliyi baxımından möhtəşəm hesab olunur.
Kolleksiyanın önəmli parçaları arasında Makedoniya Krallığı dövrünə (e.ə. 336-323) aid antik pullar, həmçinin Fransanın XIV. Louis, XV. Louis və XVI. Louis dövrlərinə aid demək olar ki, tam qızıl pul seriyaları mövcuddur.
Narcenin birbaşa varisi yox idi və yalnız bir neçə nəfər onun kolleksiyaçılıq ehtirasını bilirdi. Lakin heç kim bu böyük kolleksiyanın harada gizləndiyini bilmirdi.
Parsyə görə, kolleksiya bir notariusun səyləri nəticəsində gün işığına çıxıb. Narce vəfatından əvvəl bir baxım evinə köçmüş və ev artıq bir ildir boş idi. Notarius evdə geniş axtarış aparıb. Axtarışlar nəticəsində kolleksiyanın anbar otağında, bir tablonun arxasında gizlədilmiş divar boşluğunda saxlanıldığı məlum olub.
Etiketlənmiş və nizamlı kolleksiyanın yanında notarius hər biri 172 ədəd 20 franklıq qızıl pul olan 10 paket də tapıb. Bu miqdar təxminən bir külçə qıza bərabərdir.
Açıq hərracdan əvvəl kolleksiyanın təxminən 2 milyon avro (2,43 milyon dollar) dəyərində olması gözlənilirdi. Lakin nəticə gözləntilərdən çox olub.
