Üç ölkə üçün təhlükəli durum: Azərbaycan da var 

  İsrailin İranda yerləşən nüvə obyektlərinə mümkün hücumları bölgədə radiasiya yayılması ilə bağlı narahatlıqları artırıb. Hazırda Azərbaycanda belə durum müşahidə olunmasa da, Səhiyyə Nazirliyi və digər aidiyyəti qurumlar cənub bölgəsi və Naxçıvan Muxtar Respublikasında profilaktik ölçmələrə başlayıb.

Belə bir ssenaridə əhalinin sağlamlığı ilə bağlı hansı risklər var?

Globalinfo.az-a danışan tibb elmləri doktoru, professor Adil Qeybulla deyib ki, burada söhbət radioaktiv şüalanmadan gedir:

“Bu şüaların alfa, beta, qamma növləri var. Orqanizmimiz üçün ən təhlükəlisi beta və qammadır. Nüvə sənayesində də əsasən qamma şüalarından istifadə olunur. İranda hələ atom bombası partlamayıb, bu səbəbdən zərbə dalğası, işıq şüalanması və genişmiqyaslı radioaktiv çirklənmə kimi klassik nüvə partlayışı nəticələri müşahidə edilmir. Lakin uranın zənginləşdirilməsi zamanı istifadə edilən radioaktiv maddələrin saxlandığı reaktorların bütövlüyü pozularsa, sızma baş verə bilər. Bu isə radioaktiv şüalanmaya və müəyyən məsafədə ətraf mühit üçün təhlükəyə yol açar”.


Professorun fikrincə, belə bir sızma baş verərsə, radiasiya külək vasitəsilə Azərbaycana, Səudiyyə Ərəbistanına, Pakistana və digər ölkələrə yayıla bilər:

“Əsas məsələ sızmanın həcmi və yaranacaq radiasiya fonudur. Bu barədə dəqiq məlumat yoxdur, sadəcə mümkün risklər müzakirə obyektidir. Bildirilir ki, İsrailin endirdiyi raket zərbələrindən biri nüvə reaktorunu hədəf alıb. Bu səbəbdən təhlükə ehtimalı realdır, biz bu ssenariyə hazırlıqlı olmalıyıq”.

Adil Qeybulla əlavə edib ki, ətraf mühitin radioaktiv çirklənməsi ciddi fəsadlara gətirib çıxarar:

“Təəssüf ki, bəzi dövlətlər nüvə silahlarını təhdid vasitəsi kimi istifadə edirlər. Anlamırlar ki, Yer yaşanmaz hala gələrsə, insanlıq üçün alternativ yoxdur. Belə hallarla bağlı təxirəsalınmaz tədbirlər görülməlidir”.