Milli Məclisin deputatı Elman Nəsirov İran-İsrail müharibəsi ilə əlaqədar quru sərhədlərin İranda yaşayan azərbaycanlıların ölkəmizə gəlişinə şərait yaratmaq məqsədilə açılması barədə müzakirələrə münasibət bildirib.
Deputat Pravda.az-a açıqlamasında deyib ki, hazırkı məqamda quru sərhədlərin açılması çox həssas məsələdir.
“Quru sərhədlərin bağlı olması ilk növbədə təhlükəsizlik məsələlərindən irəli gəlir. Müharibənin davam etdiyi və milyonlarla qaçqın ordusunun yarana biləcəyi reallıqda, təbii ki, sərhədlərin bağlı olması ideyası daha böyük məna və əhəmiyyət kəsb edir. Biz qaçqın ordusunun nə olduğunu bütün dünya ölkələrindən daha yaxşı dərk edirik və fərqindəyik. Ermənistanın təcavüzü nəticəsində bizim də 1 milyondan çox qaçqın və məcburi köçkünümüz olmuşdu. Bunun ağır nəticələrinin nə olduğunu çox gözəl bilirik. Elə bu səbəbdən Azərbaycan İran-İsrail münaqişəsinin dinc yolla tənzimlənməsi üçün əlindən gələn hər şeyi etməyə hazırdır. İndiki məqamda sərhədlərin bağlı olması daha böyük aktuallıq kəsb edir. Təkrar edirəm, bu, ilk növbədə Azərbaycanın təhlükəsizlik maraqlarına xidmət göstərir”, — o bildirib.
Elman Nəsirov vurğulayıb ki, iyunun 13-nə keçən gecə İsrail dövləti İrana qarşı həyata keçirdiyi hərbi əməliyyatlar regionda vəziyyəti kritik həddə çatdırıb: “Azərbaycan dövlətinin də məlum böhranla bağlı konkret mövqeyi var və Azərbaycanın xarici işlər naziri həmin mövqeyi ifadə edib. Azərbaycan dövləti İsrail-İran münaqişəsinin sülh yolu ilə, diplomatik vasitələrlə həlli ideyasını dəstəkləyir, eyni zamanda, xüsusilə, mülki əhaliyə, mülki obyektlərə qarşı zərbələr endirilməsinin əleyhinədir, bundan çəkinməyə çağırır. Azərbaycan eskalasiyanın tezliklə bütün diplomatik vasitələrdən istifadə etməklə həll edilməsini dəstəkləyir. Biz bu mövqeyin daşıyıcısıyıq”.
Aytəkin Qardaşova
