Türkiyə İsrailin İrana hücumlarının dayandırılması üçün əlindən gələni edir.
Vətəninfo.az xəbər verir ki, bu sözləri prezident Rəcəb Tayyib Ərdoğan partiyasının Türkiyə Böyük Millət Məclisində keçirilən qrup toplantısında çıxışı zamanı deyib.
O, İsrailin İrana qarşı hücumlarını sərt şəkildə qınayıb və beynəlxalq ictimaiyyəti susqunluqla ittiham edib.
Ərdoğan çıxışında bildirib ki, İran hüquq və qayda tanımayan bir ölkə tərəfindən çox açıq şəkildə hücuma məruz qalıb.
Dövlət başçısı münaqişənin ciddiliyinə diqqət çəkərək, İsrail rəhbərliyini tənqid edib: “Netanyahu soyqırım cinayətində qəddar Hitleri çoxdan üstəliyib. Aqibətinin eyni olmayacağına ümid edirik.
O, həmçinin Yaxın Şərqdə davam edən zorakılığa qarşı qlobal səssizliyi qınayıb.
Ərdoğan həmçinin BMT başda olmaqla beynəlxalq qurumların və dövlətlərin bu hücumlara ya səssiz qaldığını, ya da açıq şəkildə dəstək verdiyini bildirib.
“Bu dövlət terroruna susmaq, baş verənlərə razılıq vermək deməkdir. Səssiz qalanların əllərinə, alınlarına və varsa vicdanlarına qətlə yetirilmiş günahsızların qanı bulaşıb”- deyə o bildirib.
Ərdoğan İsrailin son hücumlarının yalnız İrana deyil, həmçinin Qəzza, Suriya, Livan və Yəmən kimi regionlara da yönəldiyini vurğulayıb və Türkiyənin bölgədə sabitlik və sülh üçün diplomatik səylər göstərdiyini qeyd edib və bildirib ki, 13 iyun tarixindən bəri intensiv diplomatik danışıqlar aparılır.
“Terror hücumları”
Ərdoğan həmçinin İsrailin hərəkətlərinin insan itkilərinə səbəb olduğunu vurğulayaraq xəbərdarlıq edib: “Qətliama məruz qalan mülki şəxslərin, öldürülən körpələrin və uşaqların qanı təkcə İsrailin təkəbbürünü dəstəkləyənlərin əllərində və üzlərində deyil, həm də susanların üzərindədir”.
Regional sabitliklə bağlı narahatlıqları dilə gətirən Ərdoğan Türkiyənin ayıq-sayıq qaldığını bildirib: “İsrailin İrana qarşı terror hücumlarını yaxından izləyirik. Bütün qurumlarımız bu hücumların Türkiyəyə təsiri ilə bağlı mümkün nəticələrə qarşı hazır vəziyyətdədir”.
O, ictimaiyyəti əmin edərək deyib: “Millətimiz arxayın ola bilər. Hökumət Türkiyənin maraqlarını, sülhünü, birliyini və təhlükəsizliyini qorumağa tam sadiqdir”.
Ərdoğan əlavə edib: “Hər hansı mənfi inkişaf və ssenariyə qarşı hazırlıqlarımızı etmişik və etməkdəyik”.
Ərdoğan vəziyyətin təcili olduğunu vurğulayaraq münaqişənin daha geniş regional təsirlərinə işarə edib və daha çox məsuliyyət tələb edib:
“İsrailin təcavüzünü dayandırmaq dünya və bəşəriyyət üçün vacibdir. Bölgəmizdəki bütün ölkələr, o cümlədən qonşumuz İran, bu hadisələrdən lazım olan dərsləri çıxarmalıdır”.
Prezident həmçinin Türkiyənin sülh və diplomatiyaya sadiqliyini bir daha təsdiqləyərək davamlı səylər göstərəcəyini vəd edib.
“İsrailin təcavüzünü dayandırmaq üçün mübarizəmiz davam edəcək. Bölgədə sülhün bərqərar olması üçün səylərimizi artıracağıq.
Diplomatik əlaqələrimizi və telefon diplomatiyamızı dayandırmayacağıq. Hər kəsə təsir edə biləcək bir fəlakətin qarşısını almaq üçün mümkün olan hər şeyi edəcəyik”, -deyə dövlət başçısı qeyd edib.
