ain.az, Azertag portalına istinadən məlumat yayır.
Stokholm, 18 iyun, Nərgiz Cəfərli, AZƏRTAC
Bir vaxtlar özünü “zibil kraliçası” adlandıran isveçli qadın sahibkar Bella Nilsson ölkənin ən böyük ekoloji cinayət işində qanunsuz olaraq böyük miqdarda tullantı basdırması ittihamı ilə 6 il həbs cəzasına məhkum edilib.
AZƏRTAC “The Guardian”a istinadla xəbər verir ki, tullantıların idarə olunması ilə bağlı “Think Pink” şirkətinin keçmiş baş direktoru Bella Nilsson 19 ağır ekoloji cinayətdə təqsirli bilinib. Onun keçmiş əri Tomas Nilsson 12 ağır ekoloji cinayətdə təqsirli bilinərək 3 il 6 ay müddətinə azadlıqdan məhrum edilib.
Bella Nilsson qarşı onun şirkətinin 2015-2020-ci illər arasında 21 müxtəlif məkanda 200 min ton tullantı atması və ya basdırması ittihamı irəli sürülmüşdü.
Cinayət işinin hakimlərindən biri - Niklas Şullerkvist “Think Pink”in tullantı atmasının insanlar və ətraf mühit üçün böyük risklər yaratdığını deyib və onun biznesini bir növ piramida sxemi ilə müqayisə edib.
“Think Pink” bələdiyyələrdən, tikinti şirkətlərindən, mənzil-tikinti kooperativlərindən və fərdi şəxslərdən gələn arzuolunmaz tullantıların - əsasən tikinti materiallarının utilizasiyası üçün sifarişlər alıb. Lakin şirkət bunu düzgün yerinə yetirə bilməyib, əvəzində, qeyri-qanuni olaraq çeşidlənməmiş tullantıları İsveç üzrə 19 yerdə qalaqlar halında atıb.
Havaya, torpağa və suya külli miqdarda zəhərli PCB (polixlorlu bifenillər), qurğuşun, civə, arsen və başqa kimyəvi maddələr atılıb, həmçinin insanlar, heyvanlar və bitkilər üçün təhlükə yaranıb.
Keçmiş Nilsson cütlüyü də daxil olmaqla beş müttəhim ağır ekoloji cinayətlərə görə iki ildən altı ilə qədər həbs cəzasına məhkum edilib, digər beş nəfər isə ekoloji cinayətlərə görə daha qısa müddətə həbs və ya şərti cəza alıb.
Məhkəmənin qərarına əsasən, beş əsas müttəhim Botçürk bələdiyyəsi və Vesteros şəhəri də daxil olmaqla, yaşayış məntəqələrinə 25 milyon dollardan çox təzminat ödəməli olacaq.
Bu cinayət işi İsveçin Milli ekologiya və iş mühiti bölməsi tərəfindən indiyə qədər dinlənilən ən böyük çoxillik proses olub və 80 gündən çox dinləmələri ehtiva edib.
Sonrakı hadisələr barədə daha çox məlumat almaq üçün ain.az saytını izləyin.
