Dünyanın ən böyük neft və qaz şirkətlərindən biri olan Shell-in baş direktoru Wael Sawan (Vael Savan) Yaponiyada keçirilən Enerji Sammitində “Hörmüz boğazı hər hansı səbəbdən bağlanarsa, bu, qlobal ticarətə böyük təsir göstərəcək” deyib.
Sawan, Shell-in vəziyyətin pisləşəcəyi təqdirdə planlarının olduğunu bildirib.
İsrail və İran arasındakı münaqişə ABŞ-ın işə qarışması ehtimalı ilə bazarların diqqət mərkəzinə çevrilib. İndiyədək münaqişə neft qiymətlərində dəyişkənliyə səbəb olub. Bununla belə, bazarlarda yüksək həyəcanlı vəziyyət var.
Bəzi gəmilərdə son günlər siqnal müdaxiləsi yaşanır. "Hazırda xüsusilə çətin olan siqnal müdaxilələridir" deyən Sawan Shell-in Yaxın Şərqdə daşınmalarda çox diqqətli olduğunu əlavə edib.
Məsələ ilə bağlı məlumatlı mənbələrə görə, ABŞ İrana mümkün hücum üçün infrastruktur hazırlıqlarını görür, lakin vəziyyət aydın deyil.
RBC Capital Markets-in analitiki Helima Croft deyib ki, "İran liderləri təhlükə hiss edərlərsə, enerji təchizatı üçün risklər arta bilər".
"ABŞ-ın münaqişədə birbaşa iştirakı bölgədəki tankerlərə və mühüm infrastruktura birbaşa hücumlara səbəb ola bilər",- Croft deyib.
Brent markalı neft bu gün 1,4 faiz bahalaşaraq barreli 77,80 dollara yüksələrək, İsrailin İrana hücumlarının başladığı gün - iyunun 13-də gördüyü 78,5 dollara yaxınlaşıb.
