Finss.az - ABŞ-da əsas fond indeksləri çərşənbə axşamı keçirilən ticarət sessiyasında əhəmiyyətli artım nümayiş etdirib.
Səbəblər sırasında İsrail və İran arasında atəşkəslə bağlı xəbərlər və Federal Ehtiyat Sisteminin (FED) ehtiyatlı mövqeyi yer alır.
ABŞ prezidenti Donald Tramp bazar ertəsi Truth Social sosial şəbəkəsində bildirib ki, “İsrail və İran tam və hərtərəfli atəşkəslə razılaşıb”. Daha sonra hər iki ölkənin rəsmiləri bu məlumatı təsdiqləyib. Lakin qarşılıqlı ittihamlar və sonrakı raket hücumları fonunda atəşkəsin kövrək olduğu bildirilir.
İsrail hökumətinin məlumatına görə, baş nazir Benyamin Netanyahunun ABŞ prezidenti ilə telefon danışığından sonra İrana qarşı yeni hərbi əməliyyatların qarşısı alınıb. İran prezidenti Məsud Pəzeşkiyan isə bildirib ki, rəsmi Tehran atəşkəsi yalnız İsrailin ona əməl etdiyi müddətdə davam etdirəcək.
Digər tərəfdən, FED sədri Cerom Pauell Konqresdəki çıxışında bildirib ki, faiz dərəcələrinin azaldılması üçün iqtisadi mənzərənin daha aydın olması gözləniləcək. Pauellin sözlərinə görə, Tramp administrasiyasının ticarət siyasətinin inflyasiyaya təsiri qısa müddətli ola bilər, lakin bu, qiymət artımına və iqtisadi aktivliyə təsirsiz ötüşməyə bilər.
Bu açıqlamalar fonunda ABŞ istehlakçı etimadı iyun ayında azalma göstərib. Conference Board-un açıqladığı indeks 98,4-dən 93 bəndə enib. Gözləntilər isə 100 bənd idi.
Sektorlar və şirkətlər üzrə dəyişikliklər:
-
Salesforce Inc. səhmləri 3%, American Express Co. 2,9%, Nvidia isə 2,6% bahalaşıb.
-
Amazon 2,1%, Meta 2%, Alphabet 1%, Microsoft 0,9% artım göstərib.
-
Tesla 2,4%, Apple isə 0,6% dəyər itirib.
-
Neft qiymətlərinin ucuzlaşması fonunda Exxon Mobil və Chevron müvafiq olaraq 3% və 2,3% ucuzlaşıb.
-
Broadcom səhmləri HSBC tərəfindən “al” tövsiyəsi verildikdən sonra 3,9% artıb. AMD 6,8%, Texas Instruments 2,2%, ON Semiconductor 2%, Microchip Technology isə 2,7% bahalaşıb.
-
Carnival Corp. rekord maliyyə göstəriciləri ilə 6,9% artıb. Norwegian Cruise Line 4,3%, Royal Caribbean Group isə 2,5% artım göstərib.
-
KB Home isə mənfəətinin azalması səbəbilə 0,5% dəyər itirib.
İndeks nəticələri:
-
Dow Jones – +1,19% (43 089,02 bənd)
-
S&P 500 – +1,11% (6 092,18 bənd)
-
Nasdaq Composite – +1,43% (19 912,53 bənd)
