ABŞ Prezidenti Donald Tramp Haaqa şəhərində keçirilən NATO sammitində iştirakını başa vurub. Cəmi bir gün ərzində Tramp alyansa illərdir təzyiq etdiyi əsas məsələni – üzv ölkələrin müdafiə xərclərini artırmasını qəbul etdirdi.
32 ölkənin liderləri 2035-ci ilə qədər ÜDM-in 5%-ni müdafiəyə ayırmağı öhdəlik götürdülər. Tramp bu qərarı “Qərb sivilizasiyası üçün böyük qələbə” adlandırdı. NATO baş katibi Mark Rutte isə alyansın daha “güclü və ədalətli” olduğunu bildirdi.
Sammitdə Rusiya ilə bağlı əvvəlki illərlə müqayisədə daha yumşaq ifadələr işlədildi, Ukraynanın adı isə yekun sənəddə yalnız ötəri şəkildə qeyd olundu. Prezident Zelenskinin də toplantıdakı rolu azaldıldı.
Tramp əvvəlcə NATO-nun təhlükəsizlik zəmanəti olan 5-ci maddə ilə bağlı qeyri-müəyyən danışsa da, daha sonra “Bunun üçün buradayam” deyərək dəstəyini təsdiqlədi.
Sammit çərçivəsində Tramp Ukrayna prezidenti ilə də görüşdü, lakin atəşkəsə nail olmağın “çox çətin” olduğunu etiraf etdi.
Fransa, İspaniya və Belçika müdafiə xərclərinin 5%-ə qaldırılmasına tərəddüdlə yanaşsa da, yekun sənədi imzaladılar.
NATO-nun builki sammiti, Trampın əvvəlki dövrlərlə müqayisədə daha rahat və istədiklərini əldə etdiyi bir platformaya çevrildi.
