Şimali Koreya lideri Kim Çen Inın həyat yoldaşı Ri Sol Çu bir il yarımdan sonra yenidən ictimaiyyətin qarşısına çıxıb.
Moderator.az Teleqraf-a istinadən xəbər verir ki, bu barədə “Newsweek” məlumat yayıb.
Nəşr yazır ki, Ri əri və qızı Çu E ilə birlikdə elit çimərlik kurortu Vonsan Kalmanın açılış mərasimində iştirak edib.
Mənbə xüsusilə Rinin 2000 dollardan çox dəyərində olan “Gucci GG Marmont” çantasına diqqət çəkib:
“Bu, ölkəyə lüks malların ixracını qadağan edən BMT-nin sərt sanksiyaları fonunda Şimali Koreya üçün şok xəbərdir. Məhdudiyyətlərə baxmayaraq, bu cür əşyaların gömrük nəzarətindən keçmədən diplomatik kanallarla ölkəyə gətirildiyi bildirilir.
Bu, Kim Çen Inın bahalı avtomobillər və saatlardan tutmuş şəxsi təyyarələrə qədər məşhur olan dəbdəbə meylini göstərir. 2023-cü ildə Rusiya Prezidenti Vladimir Putin Şimali Koreya liderini heyran edən limuzin hədiyyə edib”.
“Newsweek” əlavə edir ki, ölkənin iqtisadi vəziyyəti son dərəcə ağır olaraq qalır:
“Mütəxəssislərin hesablamalarına görə, 2023-cü ildə əmək haqqının 10 dəfə artırılmasından sonra orta rəsmi aylıq əməkhaqqı təxminən 4 dollar təşkil edir. Bu, vətəndaşların əksəriyyətini sağ qalmaq üçün daha çox işləməyə məcbur edir.
Şimali Koreyanın birinci xanımının ictimaiyyət önündə görünməsi rejimin yeni turizm layihəsinin imicini gücləndirmək cəhdi ola bilər ki, burada da məqsəd ölkənin “çiçəkləndiyi və müasirləşdiyini” göstərməkdir”.
