A.Allahverənovun sözlərinə görə, əgər qanunvericilik həmin şəxslərin statusunun leqallaşdırılmasına imkan verirsə ki, bu proses həyata keçirilir: “Amma əgər leqallaşdırma mümkün deyilsə və heç bir əsas yoxdursa, həmin şəxslər ölkədən çıxarılır. Bu səbəbdən də, Yekaterinburqda baş vermiş son hadisəyə geniş miqyaslı prosesin davamı kimi yanaşmaq doğru deyil. Elə dövrlər olub ki, Rusiyadan qrup şəklində kifayət qədər çox sayda azərbaycanlı miqrant deportasiya olunub və bu da mətbuatda işıqlandırılıb. O dövrlə müqayisədə bu gün baş verən hadisələr statistik göstəricilər baxımından o qədər də yüksək deyil”. Millət vəkili bu cür deportasiyaların kütləvi hal almayacağı fikrindədir: “Çünki bəllidir ki, əsasən qanunsuz əsaslarla ölkədə yaşayan şəxslər deportasiyaya məruz qalırlar. Qanuni əsaslarla yaşayan şəxslərin isə bu məsələdən ciddi narahatlıq keçirməsinə ehtiyac yoxdur. Amma istənilən halda bütün məsələlər hüquqi müstəvidə həll olunmalıdır. Əgər qeydiyyatla bağlı hər hansı bir problem yoxdursa, məsələn, şəxs qeydiyyata alınıb, amma araşdırmalar zamanı məlum olur ki, bu, saxta sənədlərlə baş verib, bu halda təbii ki, həmin şəxs sərt qərarla üzləşə bilər. Əgər hər şey qanunidirsə və şəxs qanuni əsaslarla ölkədə yaşayırsa, bu halda narahatlıq üçün ciddi səbəb yoxdur. Hazırda Rusiyanın müxtəlif şəhərlərindən aldığımız məlumatlara əsasən, orada kifayət qədər çox sayda azərbaycanlı miqrant yaşasa da, ciddi narahatlıq doğuran hallar müşahidə olunmur”. Sevinc İbrahimzadə / Metbuat.az
