Türkiyədə daha üç böyük şəhərin – Adana, Antalya və Adıyaman – CHP-li (Cümhuriyyət Xalq Partiyası) bələdiyyə başçıları hüquq-mühafizə orqanlarının keçirdiyi əməliyyatla saxlanılıb.
AzNews.az xəbər verir ki, İstanbul Cumhuriyyət Baş Prokurorluğunun apardığı araşdırma çərçivəsində Adana Böyükşəhər Bələdiyyəsinin sədri Zeydan Karalar və Adıyaman Bələdiyyə sədri Abdurrahman Tutdere saxlanılıb. Onların bir müddət əvvəl təşkilatlanmış cinayət qruplaşması ilə əlaqədə olduqları, xüsusilə bəzi tender və layihələrdə rüşvət iddialarına adı qarışan şəxslərlə əlaqədə olduqları bildirilir.
Bundan əlavə, Antalya Böyükşəhər Bələdiyyə sədri Muhittin Böcek barəsində də rüşvət ittihamları ilə əlaqədar hüquqi prosedurlar başladılıb. Onun evində axtarış aparılıb və istintaq çərçivəsində ifadəsi alınıb.
İddialara görə, Zeydan Karaların Seyhan bələdiyyəsinin rəhbəri olduğu dövrdə bəzi şirkətlərdən rüşvət aldığı, Abdurrahman Tutderenin isə tenderlərin ötürülməsi müqabilində qeyri-rəsmi ödənişlərə razılıq verdiyi ehtimal olunur. Antalya bələdiyyə başçısı ilə bağlı şikayət isə adının açıqlanmayan bir iş adamının ifadəsinə əsaslanır.
Hazırda hər üç bələdiyyə başçısı barəsində istintaq davam edir və onların İstanbul prokurorluğuna təqdim edilməsi gözlənilir.
