Nyu-Hempşir ştatının federal məhkəməsi Prezident Donald Trampın ölkə ərazisində anadan olan əcnəbilərin ABŞ vətəndaşlığı almaq hüququnu məhdudlaşdıran fərmanının icrasını bloklayan qərar çıxarıb. Qərar, fərmanı qanunsuz hesab edən Amerika Vətəndaş Azadlıqları İttifaqının iddiası əsasında verilib.
AZƏRTAC xəbər verir ki, Nyu-Hempşir ştatının hakimi Cozef Laplant Ali Məhkəmənin təqdim etdiyi fürsətdən istifadə edib: söhbət kollektiv məhkəmə iddialarının verilməsindən gedir. Bu, ABŞ-da yayılmış hüquqi alətdir. Onun vasitəsilə mübahisəli aktdan təsirləndiyini hesab edən hər bir şəxs məhkəmə prosesinə qoşula bilər.
Bəzi hesablamalara görə, Donald Trampın fərmanı icra ediləcəyi təqdirdə, hər il ölkədə dünyaya gələn 150 mindən çox uşaq vətəndaşlıq hüququndan məhrum olacaq.
