ABŞ UNESCO-dan çıxır | VİDEO

AzVision.az bildirir ki, Ağ Evin mətbuat katibinin müavini Anna Kelli belə bəyanat verib.

“Amerikalıların noyabrda səs verdiyi Donald Tramp ABŞ-ni sağlam düşüncə siyasətinə tamamilə zidd olan qeyri-mütərəqqi, bölücü mədəni və sosial təşəbbüsləridəstəkləyən UNESKO-dan çıxarmaq qərarına gəlib”,- xanım Kelli “New York Post (NYP)” qəzetinə müsahibəsində deyib.

Onun sözlərinə görə, ABŞ administrasiyası UNESKO-nun müxtəliflik, bərabərlik və inklüzivlik (DEI) siyasəti ilə razılaşmır, təşkilatı“Fələstin və Çin tərəfdarı” hisslərinə görə qərəzli hesab edir.

Ağ Evə qayıtdıqdan qısa müddət sonra Tramp UNESKO-da davamlı iştirakın məqsədəuyğun olmasını öyrənmək üçün 90 günlük araşdırma aparmağa göstəriş verdi. Səlahiyyətlilər xüsusilə “UNESCO-nun ABŞ-nin maraqlarını necə dəstəlklədiyini və ümumiyyətlə dəstəkləyib-dəstəkləmədiyini” qiymətləndirməli idi.

Həmin vaxt da o, BMT-nin digər iki təşkilatının - İnsan Hüquqları Şurası və Birləşmiş Millətlər Təşkilatının Yaxın Şərqdəki Fələstin Qaçqınlarına Yardım və İşlər üzrə Agentliyinin (UNRWA) “diqqətlə nəzərdən keçirilməyə” layiq olduğunu bildirdi. Fevral ayında Tramp ABŞ-nin İsrailə qarşı “qərəzli mövqeyinə” görə tənqid etdiyi BMT-nin İnsan Hüquqları üzrə Komissarlığından çıxlması barədə sərəncam imzalayıb.

May ayında isə ABŞ prezidenti ölkənin 2026-cı maliyyə ili üçün büdcə təklifində BMT agentliklərinə, o cümlədən UNESKO-ya könüllü töhfələrin və təşkilatın müntəzəm büdcəsinin dayandırılmasını təklif edib.

Dövlət departamentinin mətbuat xidmətindən verilən açıqlamaya görə, ABŞ-nin UNESKO-dan çıxması 2026-cı il dekabrın 31-də baş tutacaq.


Sahil İsgəndərov
AzVision.az