Spiegel jurnalı yazır ki, Almaniyadakı bəzi diplomatlar hökumətin İsrailə qarşı siyasətindən narahatdırlar
Almaniya Xarici İşlər Nazirliyində çalışan bəzi diplomatların hökumətin İsraillə bağlı siyasətindən narahat olduğu iddia edilib.
“Spiegel” jurnalında “Xarici İşlər Nazirliyində üsyan” başlığı ilə dərc olunan xəbərə görə, Almaniyanın İsrail siyasəti diplomatların məyusluğuna səbəb olub.
Hazırda təxminən 130 diplomat xarici işlər naziri Johann Wadephuldan İsrailə qarşı daha sərt tədbirlər görməsini tələb edərək daxili söhbət qrupları yaradıb.
Nazirlikdəki bəzi idarələrin qapılarında və yeməkxanada Qəzzaya dəstək verən plakatlar asılır.
Əsasən 30-40 yaşlarında olan attaşelər, məsləhətçilər və şöbə müdirlərinin müavinləri hesabatlar hazırlayırlar, lakin qərarların qəbulu prosesində iştirak etmirlər.
İyerarxiyanın yuxarı eşelonlarında olan yaşlı diplomatlar dövlət maraqlarını müdafiə edərkən, gənclər Almaniyanın İsrailə Rusiyadan və Myanmadakı hərbi xuntadan fərqli davranmamalı olduğunu müdafiə edirlər.
Bəzi diplomatlar Almaniyanın İsrailə silah dəstəyinin gələcəkdə hüquqi məsuliyyətə səbəb ola biləcəyindən narahatdırlar.
Onlar öz arqumentlərini beynəlxalq hüquqa əsaslandıraraq xəbərdarlıq edirlər ki, Beynəlxalq Ədalət Məhkəməsi Qəzzada müharibə cinayətləri, insanlığa qarşı cinayətlər və hətta soyqırımlar törədildiyinə qərar verərsə, “Almaniya şəraitdən tam xəbərdar olaraq Qəzzada istifadə olunan silahları tədarük etməklə buna töhfə verməsi ittihamı ilə üzləşməli olacaq”.
Misir və Pakistan kimi yerlərdə səfir vəzifəsində çalışmış keçmiş diplomat Martin Kobler, "Xarici İşlər Nazirliyində dövlət maraqlarının heç vaxt Almaniyanın beynəlxalq hüquqa sadiqliyi ilə ziddiyyət təşkil etməməli olduğuna inanan diplomatların sayı artmaqdadır" dedi.
Kobler bildirib ki, Xarici İşlər Nazirliyindəki həmkarları “Almaniyanın Aİ-yə üzv dövlətlər arasında təcrid olunmasını” narahatedici hesab edirlər.
Keçən ay 13 keçmiş səfir Almaniya hökumətini “silah ixracı və İsraillə hərbi əməkdaşlıqla bağlı daha məhdudlaşdırıcı mövqe” tutmağa çağıran məktub paylaşmışdı.
Xarici İşlər Nazirliyi diplomatların etirazını bildirdikləri söhbət qrupunun mövcudluğunu təsdiqləyib və bu məsələ ilə bağlı nazir Vadeful ilə görüşün gündəmdə olduğunu bildirib.
aia.az
Tərcümə şöbəsi
