Qətərin Trampa hədiyyə etdiyi təyyarə 2 il ərzində hazır vəziyyətə gətiriləcək

Donald Trampa Qətər kral ailəsi tərəfindən hədiyyə edilən Boeing 747-8 təyyarəsinin təmir və modernizasiya xərclərinin ABŞ nüvə qüvvələrinin modernizasiyası proqramı çərçivəsində qarşılandığı ehtimal edilir.

Bizim.Media xəbər verir ki, bu barədə The New York Times (NYT) məlumat yayıb.

Amerikalı konqresmenlər Pentaqonun büdcə sənədlərindən birində “gözə çarpmayan” maddə altında 934 milyon dollarlıq vəsaitin göstərildiyini aşkarlayıblar. Bu məbləğin hansısa məxfi layihəyə ayrıldığı bildirilsə də, müşahidəçilər bunun məhz Trampın yeni “bir nömrəli təyyarəsinin” (Air Force One) yenidən qurulmasına yönəldiyini düşünürlər.

ABŞ Hərbi Hava Qüvvələrinin rəhbəri Troy Maynk Konqres qarşısında çıxışında bu təyyarənin modernizasiyasının əslində 400 milyon dollardan az başa gələcəyini söyləyib.

Hərbi Hava Qüvvələrinin bəzi rəsmiləri anonim şəkildə etiraf ediblər ki, təyyarənin təmiri üçün vəsait büdcəni aşan və gecikən layihədən götürülüb.

NYT-nin məlumatına görə, söhbət ABŞ-ın köhnəlmiş yerüstü nüvə raketlərinin yenilənməsini nəzərdə tutan “Sentinel” proqramından gedir.

Qətər tərəfindən bağışlanan təyyarədə kommunikasiya və müdafiə sistemlərinin yenilənməsi vacib sayılır. Bundan əlavə, NYT yazır ki, təyyarədə casus avadanlıqlarının – dinləmə qurğularının olması ilə bağlı şübhələr də mövcuddur və bu da “həssas məsələ” kimi dəyərləndirilir.

Təyyarənin hazır vəziyyətə gətirilməsi bir-iki il çəkəcək, daha sonra isə Tramp 2029-cu ildə vəzifədən getdikdən sonra onun prezident kitabxanasına təhvil veriləcək.

Xatırladaq ki, Boeing 747-8 təyyarəsi may ayında Ağ evə təqdim edilmişdi. Onun lüks interyeri səbəbilə “uçan saray” adlandırıldığı bildirilir. Tramp administrasiyası bu təyyarəni yeni Air Force One kimi istifadə etməyi planlaşdırır. Hazırda prezident donanmasında 1990-cı ildən istismarda olan iki ədəd Boeing 747-200 mövcuddur. ABŞ Hərbi Hava Qüvvələri bu təyyarələrin əvəzlənməsi üçün Boeing şirkəti ilə müqavilə imzalayıb, lakin ləngimələr səbəbilə onların təslimi 2029-cu ildən tez olmayacaq.

Bizim.Media

Qətərin Trampa hədiyyə etdiyi təyyarə 2 il ərzində hazır vəziyyətə gətiriləcək – DETALLAR

Sign in to your account

Sign up

Şifrəni bərpa et