Asiya İnkişaf Bankı tərəfindən təsdiqlənmiş 2025–2029-cu illəri əhatə edən yeni Ölkə Tərəfdaşlıq Strategiyası Azərbaycanda yaşıl və şaxələndirilmiş iqtisadiyyatın qurulmasına yönəlmiş uzunmüddətli inkişaf vizyonuna mühüm dəstək verməyi hədəfləyir. Strategiyada dayanıqlı artım, inklüziv inkişaf və regional inteqrasiyanın gücləndirilməsi kimi hədəflər prioritet istiqamətlər kimi müəyyən olunub. Eyni zamanda sənəd Azərbaycanın milli inkişaf strategiyaları ilə uzlaşdırılıb və iqtisadi modernizasiya, iqlim fəaliyyətinin gücləndirilməsi, rəqəmsal transformasiya və gender bərabərliyi sahələrini əhatə edən kompleks yanaşma təklif edir.
Yeni strategiyanın əsas məzmunu yaşıl iqtisadiyyat və aşağı-karbonlu bağlantıların inkişaf etdirilməsi istiqamətində davamlı siyasətlərin dəstəklənməsidir. Bu, əslində Azərbaycanın uzunmüddətli iqlim öhdəlikləri ilə üst-üstə düşür və enerji istehsalı, nəqliyyat və kənd təsərrüfatı kimi sahələrdə çevik texnoloji transformasiyaya yol aça bilər. Strategiya çərçivəsində yüksək əlavə dəyərli məhsulların və xidmətlərin inkişafı ilə rəqabətqabiliyyətli iqtisadi modelin formalaşdırılması hədəflənir. Bununla yanaşı, peşəkar insan kapitalının gücləndirilməsi vurğulanır ki, bu da innovasiyaya əsaslanan iqtisadiyyata keçidin başlıca şərtlərindən biridir.
AİB-nin bu strategiya vasitəsilə Azərbaycanın inkişaf prioritetlərinə uyğunlaşdırılmış maliyyə alətləri və strateji tərəfdaşlıq çərçivələri təqdim etməsi, ölkə üçün həm daxili resursların səmərəli istifadəsinə, həm də xarici investisiya cəlbediciliyinin artmasına təkan verə bilər. Bu yanaşma eyni zamanda iqtisadi strukturun tədricən şaxələndirilməsinə və neftdən asılılığın azaldılmasına şərait yaradır. Özəl sektorun aparıcı rola keçidinə önəm verilməsi isə iqtisadiyyatda təşəbbüskarlığın və bazar mexanizmlərinin gücləndirilməsi baxımından əhəmiyyətlidir.
Strategiyanın uğurla icrası Azərbaycanın regional iqtisadi təşəbbüslərdə daha fəal iştirakını da stimullaşdıra bilər. AİB-nin dəstəyi ilə reallaşdırılacaq infrastruktur və texnoloji layihələr, eyni zamanda iqlim dəyişikliyinə uyğunlaşma tədbirləri təkcə makroiqtisadi göstəricilərin deyil, əhalinin rifah səviyyəsinin və sosial inklüzivliyin də yüksəlməsinə xidmət edə bilər. Strategiya nəticələrinin ÜDM-in artımı ilə yanaşı, ətraf mühitin qorunması və ictimai rifah göstəriciləri ilə ölçülməsi planı iqtisadi inkişafın daha kompleks və humanist yanaşma ilə qiymətləndirilməsinə imkan yaradır.
Dünya Bankı, Avropa Yenidənqurma və İnkişaf Bankı kimi digər beynəlxalq maliyyə institutlarının da Azərbaycan üçün benzer yanaşmalar qəbul etdiyi bir vaxtda, AİB-nin yeni strategiyası regional və qlobal trendlərə inteqrasiya baxımından ölkənin strateji mövqeyini daha da möhkəmləndirə bilər. Xüsusilə rəqəmsallaşma və iqlim risklərinin idarə olunması sahələrində atılacaq addımlar ölkənin beynəlxalq reytinqlərdə dayanıqlılıq və innovasiya göstəricilərini də müsbət təsir edə bilər.
