Türkiyə Statistika Təşkilatı (TÜİK) iyul ayına dair istehlakçı və istehsalçı qiymətləri ilə bağlı məlumatları (inflyasiya göstəricilərini) açıqlayıb.
Marja.az xəbər verir ki, iyul ayında ölkədə istehlak qiymətləri əvvəlki aya nisbətən 2,06% artıb.İllik artım isə 33,52% təşkil edib.
Analitiklər aylıq inflyasiyanın 2,38%, illik inflyasiyanın isə 34,10% olacağını proqnozlaşdırırdılar.
İyun ayında aylıq inflyasiya 1,37%, illik inflyasiya isə 35,05% olmuşdu.
TÜİK-in məlumatlarına görə, illik baza inflyasiya iyul ayında 34,70% olaraq qeydə alınıb.
Ən yüksək aylıq artım isə 5,78% ilə mənzil qrupunda olub. İkinci yerdə 5,69% ilə spirtli içkilər və tütün, ardınca isə 4,25% ilə rabitə gəlir. Geyim və ayaqqabıda isə 5,82% mənfi inflyasiya (deflyasiya) qeydə alınıb.
İllik artım baxımından ən yüksək göstərici 75,54% ilə təhsildə olub. Təhsil sektorunun ardınca 62,01% ilə mənzil, 37,49% ilə isə səhiyyə gəlir.
İstehsalçı qiymətləri indeksi iyul ayında iyun ayına nisbətən 1,73% artıb. İstehsalçı qiymətlərində illik artım isə 24,19% olaraq açıqlanıb.
