Ajans.az ABŞ mediasına istinadən xəbər verir ki, bu təşəbbüs ayda daimi insan məskəni yaratmaq planlarının bir hissəsidir. Layihənin məqsədi ay səthində uzunmüddətli enerji təminatını həyata keçirməkdir. NASA-nın müvəqqəti rəhbəri Şon Daffi kommersiya şirkətlərini ən azı 100 kilovat gücündə nüvə reaktoru dizayn etmək üçün təkliflər verməyə çağırıb. Bu miqdar yer səviyyəsindəki tipik enerji mənbələrindən daha az olsa da, ayda günəş enerjisinin məhdud imkanları fonunda alternativ kimi mühüm hesab olunur. NASA hələ 2022-ci ildə nüvə reaktoru dizaynı üçün üç şirkətlə müqavilə imzalayıb. Bu ilin mayında isə Çin və Rusiya 2035-ci ilə qədər ayda avtomatlaşdırılmış atom elektrik stansiyası qurmaq planlarını açıqlayıb. Ekspertlər hesab edir ki, ayda iki həftəlik gecə və iki həftəlik gündüz dövrü səbəbindən davamlı enerji üçün nüvə gücü ən real həlldir. Bununla belə, NASA son illərdə ciddi büdcə kəsintiləri ilə üzləşib. Mars missiyası da daxil olmaqla bir sıra elmi proqramlar ixtisar olunub. Mütəxəssislər xəbərdarlıq edirlər ki, layihənin siyasi məqsədlərlə irəli aparılması elmi prioritetlərə zərər vura bilər. Eyni zamanda, nüvə texnologiyasının ayda yerləşdirilməsi təhlükəsizlik baxımından da mübahisə doğurur. Mütəxəssislər radioaktiv materialların kosmosa daşınması və istifadəsi ilə bağlı ciddi tənzimləmələrə ehtiyac olduğunu vurğulayırlar. NASA-nın Artemis proqramı çərçivəsində 2027-ci ildə insanları ay səthinə göndərməsi planlaşdırılır. Lakin maliyyə çətinlikləri və texniki maneələr layihənin vaxtında reallaşmasına risk yaradır.
