Ajans.az xəbər verir ki,təbii fəlakət xüsusilə Uttarkashi rayonunda ciddi dağıntılara səbəb olub, xilasetmə işləri isə çətin hava şəraiti və infrastruktur zədələnməsi səbəbindən ləng aparılır. Çərşənbə axşamı günü saat 13:30-da baş verən leysan nəticəsində dağlardan Dharali kəndinə doğru axan güclü su seli yolları və binaları su altında qoyub. Rəsmilər bildirir ki, hazırda xilasetmə əməliyyatları davam edir, lakin güclü yağışlar və zədələnmiş yollar səbəbindən əraziyə çatmaq çətinləşib. Uttarakhand əyalətinin baş naziri Puşkar Sinq Dhami bildirib ki, indiyədək 130 nəfər xilas edilib. Yerli media 4 nəfərin öldüyünü bildirsə də, rəsmi qurumlar BBC-yə açıqlamalarında hələ ki, cəsədlərin tapılmadığını bildiriblər. Leysan— qısa müddətdə kiçik əraziyə düşən intensiv yağış nəticəsində yaranan təbii hadisə — Kheerqanqa çayının daşmasına və tonlarla palçıqlı suyun dağlıq əraziləri bürüməsinə səbəb olub. Dharali kəndi Hindistan ordusunun böyük bazası yerləşən Harsildən cəmi 2 kilometr məsafədədir. Rəsmilər Harsil bazasında yerləşən azı 10 əsgərin də itkin düşdüyünü açıqlayıb. Ərazini palçıq və dağıntılar bürüdüyündən xilasetmə əməliyyatları çətinləşib. Zəif rabitə və elektrik enerjisinin kəsilməsi isə müvafiq xidmətlərin əlaqə imkanlarını məhdudlaşdırıb. Qanqotri bölgəsində — Dharalidən təxminən 18 km məsafədə — fəlakətə cavab qüvvələrinin bir neçə komandası fəaliyyət göstərir. Lakin zəif şəbəkə səbəbindən onlarla əlaqə qurmaq mümkün olmur. Daşqın nəticəsində Bhagirathi çayının bir hissəsi bağlanaraq süni göl formalaşıb. Bu göl hökumətin helikopter meydançası da daxil olmaqla geniş əraziləri su altında qoyub. Rəsmilər xəbərdarlıq edirlər ki, su tezliklə boşaldılmasa, çayın aşağı axarında yerləşən şəhər və kəndlər ciddi təhlükə altına düşə bilər. Hindistanın Meteorologiya Departamenti yaxın günlərdə bölgədə güclü yağışların davam edəcəyini proqnozlaşdırır və sakinlərə sürüşmə riski olan ərazilərdən uzaq durmağı tövsiyə edib. Əyalətin bəzi bölgələrində məktəblər bağlanıb. Dharali, yay aylarında populyar turizm məkanı və Char Dham Yatra ziyarət marşrutunun əsas dayanacaqlarından biridir. Musson mövsümündə ziyarətçi sayı azaldığı üçün turistlərin daha geniş şəkildə təsirlənməsinin qarşısı alınıb. Yerli sakinlər xəbərdarlıq edirlər ki, bölgədə izdiham olsaydı, fəlakətin miqyası daha böyük ola bilərdi. Uttarakhand əyaləti Qərbi Himalayda yerləşir və sürüşmələr, daşqınlar baxımından yüksək riskli zonalardan hesab olunur. 2021-ci ildə baş verən oxşar leysan nəticəsində 200-dən çox insan həlak olmuşdu. Ən ağır fəlakətlərdən biri isə 2013-cü ildə baş verib, minlərlə insan həyatını itirmiş və Kedarnath şəhəri daxil olmaqla bir çox ərazi su altında qalmışdı.
