BAKI, TurkicWorld, Nərmin Ağayeva
ABŞ Ukraynaya 203,5 milyon dollarlıq yeni hərbi yardım paketinə icazə verib.
TurkicWorld xəbər verir ki, ABŞ Müdafiə Nazirliyi Dövlət Departamentinin Ukraynaya ümumilikdə 203,5 milyon dollar dəyərində “potensial hərbi texnika və xidmətlərin satışını” təsdiqlədiyini açıqlayıb.
Pentaqonun Müdafiə Təhlükəsizliyi Əməkdaşlıq Agentliyinin məlumatına görə, satış paketinə M777 haubitsaları və müvafiq avadanlıqlar üçün ehtiyat hissələri, texniki xidmət və logistik dəstək daxildir. Bu bölmə ümumilikdə 104 milyon dollar təşkil edir. Bundan əlavə, nəqliyyat xidmətləri və müvafiq avadanlıqların potensial satışı təxminən 99,5 milyon dollar dəyərində qiymətləndirilir.
Açıqlamada vurğulanıb ki, bu satış Ukraynanın hazırkı və gələcək təhlükələrlə mübarizə imkanlarını gücləndirməklə yanaşı, regional təhlükəsizlik missiyalarında da effektivliyini artıracaq. Qeyd olunub ki, layihə çərçivəsində əsas podratçı Böyük Britaniyada yerləşən müdafiə sənayesi şirkəti BAE Systems olacaq.
Qeyd edək ki, ABŞ son aylarda Ukraynaya hərbi və texniki dəstəyi davamlı şəkildə artırır, bu da regionda hərbi balansın qorunmasına xidmət edir.
