Praqa, 18 avqust, AZƏRTAC
Çexiyada silaha maraq kəskin artıb.
AZƏRTAC ölkənin Daxili İşlər Nazirliyinin məlumatına istinadla xəbər verir ki, vətəndaşlar arasında qeydiyyatda olan odlu silahların sayı 1,1 milyona yaxınlaşıb. “Flobert” adlanan patronların satın alınmasında artım xüsusilə nəzərə çarpır, onların sayı bir il ərzində 50% çoxalıb.
Səbəb 2026-cı il yanvarın 1-dən qüvvəyə minəcək yenilənmiş “Odlu silah və döyüş sursatları haqqında” qanunun qüvvəyə minməsidir. Həmin andan etibarən “Flobert” patronları üçün silahlar daha sərt kateqoriyaya keçəcək və onların alınması üçün lisenziya tələb olunacaq. Lakin yeni qaydalar yalnız gələcək satınalmalara təsir edəcək: mövcud silahlar öz sahiblərində qalacaq.
Düzəlişlər silah ticarətinə nəzarəti gücləndirir. Satıcılardan şübhəli satınalmalar barədə məlumat vermələri tələb olunur, əgər müştəri icazəsiz silah almağa çalışırsa, qeyri-adekvat davranırsa və ya ciddi stres keçirirsə, onlar bununla bağlı müvafiq orqanlara xəbər verməlidir. Qanun təhlükəsizlik təhlükəsi yaranarsa, silahların müsadirə edilməsini də nəzərdə tutur. Bundan əlavə, icbari tibbi müayinənin müddəti 10 ildən 5 ilə endirilir.
Qaydaların sərtləşdirilməsi 2023-cü ilin sonunda Praqada Karl Universitetində bir tələbənin atəş açması faciəsi ilə əlaqələndirilir. Həmin insident zamanı 14 nəfər həlak olub, 25 nəfər yaralanıb.
Vüqar Seyidov
AZƏRTAC-ın xüsusi müxbiri
Praqa
