Bakı, 19 avqust, AZƏRTAC
Azərbaycan Mərkəzi Bankının (AMB) baş direktoru Fuad İsayev Azərbaycan Mikromaliyyə Assosiasiyasının və ona üzv təşkilatların rəhbərləri ilə görüşüb.
AMB-dan AZƏRTAC-a bildirilib ki, görüşdə cari ilin birinci yarısında bank olmayan kredit təşkilatlarının fəaliyyət nəticələri, bu sahədə əldə edilmiş nailiyyətlər və inkişaf perspektivləri geniş müzakirə olunub.
Görüşdə alternativ maliyyələşdirmə mənbələrinə çıxış imkanlarının genişləndirilməsi istiqamətində Mərkəzi Bankın yeni maliyyə alətlərindən istifadə və dövlət fondları ilə əməkdaşlıq perspektivləri, işğaldan azad olunmuş ərazilərdə fəaliyyət potensialları və real sektorun maliyyələşdirilməsinin zəruriliyi, institusional potensialın gücləndirilməsi ətrafında müzakirələr aparılıb, təkliflər dinlənilib, həmçinin növbəti dövrdə birgə görüləcək işlər müəyyən edilib.
