Adil Qeybulla: “Bu cür şəxslərin hansısa əməliyyatlar icra etməsi insanlar üzərində klinik eksperiment aparmaq anlamına gəlir”
Son vaxtlar bəzi tibb mərkəzlərində estetik əməliyyatlar etdirən və nəticədən məmnun qalmadığı üçün əlaqədar qurumlara şikayət edən vətəndaşların sayı əhəmiyyətli dərəcədə artmaqdadır. Maraqlı məqamlardan biri isə bundan ibarətdir ki, məhz vətəndaşların şikayətlərindən sonra aparılan yoxlamalar nəticəsində məlum olur ki, proseduru həyata keçirən “həkimin” bunun üçün lazımi tibbi təhsili yoxdur. Bu azmış kimi, bəzi hallarda şəhərin mərkəzi hissələrində fəaliyyət göstərən bəzi estetik mərkəzlərin də tamamilə qeydiyyatsız fəaliyyət göstərdiyi üzə çıxır.
Mövzu ilə bağlı Moderator.az-a açıqlama verən professor Adil Qeybulla bu kimi problemlərlə üzləşməmək üçün konkret addımlar atmağın vacibliyi qənaətindədir:
“Bu cür situasiyaların yaranmaması üçün hər bir həkimin lisenziyası olmalıdır. Ölkədə akkreditasiya sistemi fəaliyyət göstərməlidir. Həkimlərə müvafiq lisenziya verilməlidir. Onların diplomları, şəhadətnamələri, sertifikatları yoxlanılmalıdır. Bütün bunların əsasında onlara fəaliyyət lisenziyası verilməlidir. Xatırladım ki, bu lisenziya müəyyən müddət üçün verilir. Müxtəlif ölkəlrədə lisenziyanın müddəti müxtəlif olur.
Bizdə isə vəziyyət fərqlidir. Bizdə kimsə hansısa sertifikat alır və bununla guya dönüb olur həkim.
Həkimlik diplomu olmadan, rezidentura təhsili olmadan həkimlik fəaliyyəti ilə məşğul olmaq, konkret olaraq cinayətdir. Bu cür şəxslərin hansısa əməliyyatlar icra etməsi insanlar üzərində klinik eksperiment aparmaq anlamına gəlir. Bu adamlarla hüququn dili ilə danışılmalıdır”.
Seymur ƏLİYEV
