İranın Moskvadakı səfiri Kazem Cəlali bildirib ki, İran “Qazprom”la danışıqlarda bir çox məsələlərin həllindən sonra Azərbaycan vasitəsilə Rusiyadan təbii qaz tədarükünə başlamağa ümid edir.
Hafta.az-ın yazdığına görə, Rusiyanın TASS -a verdiyi açıqlamada Cəlali, "Ümid edirik ki, bu, tezliklə baş verəcək. Hazırda "Qazprom"la danışıqlar aparırıq və məsələlərin çoxu artıq həll olunub. Bununla belə, qiymətlərlə bağlı razılığa gəlmək lazımdır. Bu məsələ həll edildikdən sonra hər şey işə düşəcək" deyib.
Ötən ilin aprelində “Qazprom” İranın milli təbii qaz şirkəti NIGC ilə 2024-cü ildə boru kəmərləri vasitəsilə İrana təbii qaz tədarük etmək üçün anlaşma memorandumu imzaladıqdan sonra Moskva və Tehran Rusiyadan 55 milyard kubmetr təbii qazın tədarükünə dair razılığa gəliblər. Lakin o zaman kəmərin potensial marşrutları açıqlanmamışdı. Bu addım Ukraynada müharibə başlayandan bəri Moskvanın Tehranla münasibətlərini gücləndirməsinin nəticəsidir və iki tərəf ötən ilin yanvarında strateji tərəfdaşlıq sazişi imzalayıb.
Ölkələr Qərbin sanksiyaları ilə mübarizə apardıqca, Rusiyanın Avropaya neft və təbii qaz ixracı əhəmiyyətli dərəcədə azalıb.
Rusiyanın İranla uzun əməkdaşlıq tarixi var. Rusiyanın İranın cənubunda, ölkənin ilk nüvə reaktoru olan Buşəhr Nüvə Reaktorunun tikintisinə verdiyi töhfə bu əməkdaşlığın bariz nümunəsidir.
