Android-də kənar tətbiqlərin quraşdırılması çətinləşəcək
Ajans.az ArsTechnica-ya istinadən xəbər verir ki, Android platformasının əsas fərqlərindən biri iOS-a nisbətən proqramların rəsmi mağazadan kənar quraşdırılmasına imkan verməsidir. Lakin 2026-cı ildən başlayaraq şirkət istifadəçiləri virus və fırıldaqçılardan qorumaq üçün yeni məhdudiyyətlər tətbiq edəcək. Google-un mühəndisləri bildiriblər ki, üçüncü tərəf tərtibatçıları tətbiqlərini Google Play-də yerləşdirməsələr belə, identifikasiya prosesindən keçməlidirlər. Əks halda, həmin tətbiqlərin sertifikatlaşdırılmış Android cihazlarına quraşdırılması mümkünsüz olacaq. Sertifikatlaşdırılmış cihazlara Google-un əvvəlcədən quraşdırılmış tətbiqləri ilə gələn smartfonlar daxildir. Şirkət bu prosesi “təyyarəyə minməzdən əvvəl sənədlərin yoxlanılması” ilə müqayisə edib, lakin vurğulayıb ki, proqramların məzmunu yoxlanılmayacaq, yalnız tərtibatçıların şəxsiyyəti təsdiqlənəcək. Yeni sistem 2025-ci ilin oktyabrından sınaqdan keçiriləcək, 2026-cı ildən isə əvvəlcə Braziliya, İndoneziya, Sinqapur və Taylandda tətbiq olunacaq. 2027-ci ildən etibarən qaydalar bütün dünyada qüvvəyə minəcək. Avqustun əvvəlində həmçinin məlum olmuşdu ki, Android cihazlarında sürətli enerji doldurma funksiyası yalnız smartfon kilidi açıldıqdan sonra işləyəcək.
