Avropa ölkələrinin liderləri Rusiya və Ukrayna cəbhələri arasında sülh sazişi çərçivəsində 40 kilometrlik bufer zonası yaradılması məsələsini nəzərdən keçirirlər. Marja xəbər verir ki, bu barədə Politico nəşri yazır.
Beş avropalı diplomat nəşrə bildiriblər ki, rəsmilər zona dərinliyi ilə bağlı yekdil mövqedə deyillər. Bundan başqa, Kiyevin bu planı qəbul edib-etməyəcəyi də qeyri-müəyyəndir, çünki təklifin ərazi güzəştlərini nəzərdə tutması ehtimal olunur. Məlumatda həmçinin qeyd edilir ki, ABŞ, görünür, bufer zonası ilə bağlı müzakirələrdə iştirak etmir.
Politico yazır ki, sərhədi patrul etmək üçün lazım olacaq hərbi qüvvələrin sayı da narahatlıq doğurur. Rəsmilər 4 mindən 60 minə qədər hərbi qulluqçunun göndərilməsini müzakirə edirlər. Lakin indiyədək heç bir ölkə öhdəlik götürməyib, ABŞ prezidenti Donald Tramp isə Amerika qoşunlarının mümkün iştirakından imtina edib.
Avqustun 18-də ABŞ prezidentinin xüsusi nümayəndəsi Kit Kellogla görüşündə Ukrayna prezidenti Vladimir Zelenski Trampın irəli sürdüyü ərazi güzəştlərini mümkünsüz adlandırmışdı. Avqustun 28-də isə The Atlantic mənbələrə istinadən yazmışdı ki, Tramp Ukrayna və Avropa İttifaqının münaqişənin həlli ilə bağlı tələblərini real hesab etmir. Amerika lideri hesab edir ki, müharibənin başa çatması üçün Kiyev və Aİ Ukraynanın müəyyən ərazi güzəştlərinə getməli olduğunu qəbul etməlidir.
