Rusiya ATƏT-in Minsk qrupunun buraxılması ilə bağlı Azərbaycan və Ermənistanın birgə qərarını dəstəkləyir.
APA RBC-ya istinadən xəbər verir ki, bu barədə Rusiyanın ATƏT-dəki daimi nümayəndəsi Aleksandr Lukaşeviç bildirib.
Onun sözlərinə görə, ATƏT-in Minsk qrupun 2025-ci ilin dekabrına qədər tam ləğv edilməsi planlaşdırılır: “Burada söhbət üç institutun – Minsk qrupunun, ATƏT-in fəaliyyətdə olan sədrinin şəxsi nümayəndəsinin və Yüksək Səviyyəli Planlaşdırma Qrupunun işinə xitam verilməsindən gedir”.
Lukaşeviç Minsk qrupunun saxlanmasının məqsədəuyğun olmaması ilə bağlı Azərbaycan və Ermənistanın mövqeyini nəzərə alaraq, onun ləğvinin qarşısını almaq üçün heç bir əsas görmədiklərini qeyd edib.
Qeyd edək ki, Azərbaycan xarici işlər naziri Ceyhun Bayramovun sözlərinə görə, Minsk Qrupunun ləğvi barədə 1 sentyabrda qərarın qəbulu gözlənilir.
Təşkilatdan ATƏT-in Minsk qrupunun sentyabrın 1-də ləğvi ilə bağlı qərar layihəsi təsdiq üçün iştirakçı dövlətlərə təqdim edildiyi bildirilib.
Xatırladaq ki, ATƏT-in Minsk qrupunun tərkibinə həmsədr ölkələr – ABŞ, Fransa və Rusiya daxildir.
