Bu gün Ukraynanın müstəqilliyi, suverenliyi və ərazi bütövlüyü uğrunda mübarizədə həlak olmuş ukraynalıların anım günü qeyd olunur.
Hafta.az yazır ki, məhz 29 avqust tarixində müasir Ukrayna tarixinin ən faciəli hadisələrindən biri - 2014-cü ilin İlovaysk faciəsi baş verib. İlovayskdan çıxarkən günəbaxan tarlalarından “yaşıl dəhliz”dən təhlükəsiz keçməyə zəmanət verilib. Ancaq rusiyalı müharibə cinayətkarları razılaşmaları pozub, xaincəsinə cinayət törədib və dəhlizdən keçən Ukrayna əsgərlərinə yaxın məsafədən atəş açaraq onları qətlə yetirib. Ona görə də, günəbaxan çiçəyi bu qara günün simvoluna çevrilib.
2014-cü ildən bəri Rusiyanın təcavüzü ukraynalıların - hərbiçilərin və mülki şəxslərin həyatını alır. Hər bir itki Ukraynaya azadlıq üçün dəhşətli qiyməti xatırladan bir ağrıdır.
Həlak olmuş qəhrəmanların xatirəsi Ukrayna küçə və məktəblərinin adlarında, ukraynalı şairlərin şeirlərində, mahnılarında, əməllərində canlanır. Onların hekayələrini və göstərdikləri cəsarəti Ukrayna xalqı heç vaxt unutmayacaq.
Bu ağrılı gündə vətən uğrunda canından keçən ukraynalı qəhrəmanların xatirəsi Ukraynanın Azərbaycandakı Səfirliyində də anılıb. Səfirlikdə yaradılmış Xatirə lövhəsinin önünə gül dəstələri qoyularaq ehtiram göstərilib.
