ain.az, Qaynarinfo portalına istinadən məlumat verir.
"9-10 noyabr bəyannaməsinin reanimasiyası artıq qeyri-mümkündür".
Bunu Qaynarinfo-ya açıqlamasında siyasi şərhçi Arif Əliyev Ermənistanın baş naziri Nikol Paşinyanın 2020-ci il 10 noyabr üçtərəfli bəyanatına qayıtmağın artıq mənasız olduğu barədə fikirlərini şərh edərkən deyib.
"9-10 noyabr bəyannaməsi çox qısa müddətdə öz rolunu yerinə yetirdi. Amma çox tez də öz əhəmiyyətini itirdi", deyə Arif Əliyev bildirib.
Həmsöhbətimiz qeyd edib ki, bəyannamənin bəndlərinin artıq işlənmədiyi və onun öz əhəmiyyətini itirdiyi bu və ya digər formada dəfələrlə bəyan edilib:
"Yalnız Rusiya Xarici İşlər Nazirliyinin nümayəndəsi Vaşinqton görüşündən sonra bir daha bildirdi ki, sözügedən bəyannamə gündəmdədir. Ola bilsin ki, Moskva onu hansısa formada gündəmdə saxlamaq istəyir. Amma hansı formada başa düşmək olmur. Öndə olan məsələlər baxımından burada nə Zəngəzur yolu haqqında yazılan bəndlər işləyə bilməz, nə də ki, Rusiyanın sülhməramlı fəaliyyəti hansısa bir rola malikdir. Odur ki, Paşinyan faktiki olaraq yeni heç bir şey deməyib. Sadəcə açıq və dəqiq formada məsələni ifadə edib".
Ekspert düşünür ki, mövcud vəziyyətdə Rusiya proseslə bağlı öz iştahını mövcud reallıqlara, Bakı ilə İrəvanın mövqelərinə nisbətən uyğunlaşdırmaq məcburiyyətində qalacaq:
"Rusiya bu fonda öz dilində müxtəlif formalarda Ermənistan və Azərbaycana təzyiqlər edir. Rusiyadakı azərbaycanlılara qarşı təzyiqlər baş verir. Rəsmilərin sərhədləri keçən çıxışları da səngimir. Kreml bu fonda daha ciddi təzyiq formalarına əl atmağa da cəhd edə bilər. Lakin bütün hallarda Rusiyanın imkanları xeyli dərəcədə məhduddur. Azərbaycan və Ermənistanın özünümüdafiə imkanları isə xeyli dərəcədə genişdir. Düşünürəm ki, Rusiya öz iştahını mövcud reallıqlara, Bakı ilə İrəvanın mövqelərinə nisbətən uyğunlaşdırmaq məcburiyyətində qalacaq. Bununla belə ehtiyatı da əldən verməməliyik. Çünki hansı şəraitdə yaşadığımızı və kimin hansı iştahda olduğunu bilirik".
Qeyd edək ki, Ermənistan baş naziri Nikol Paşinyan hökumətin iclasından sonra keçirilən brifinqdə Bakı, İrəvan və Moskva arasında imzalanan 2020-ci il 10 noyabr tarixli üçtərəfli bəyanata qayıtmağın mənasının olmadığını bəyan edib: "2020-ci il 10 noyabr tarixli üçtərəfli bəyanata qayıtmağın mənası yoxdur, çünki həmin sənəd artıq keçmişdə qalıb".
O, buna əsas kimi də avqustun 8-də Vaşinqtonda Ermənistanla Azərbaycan arasında imzalanan sülh sazişinin paraflanması və Zəngəzur dəhlizinin açılması ilə bağlı sənədi göstərib. Paşinyan vurğulayıb ki, "bərqərar olunmuş sülhü qorumağı” özünün əsas vəzifəsi hesab edir və cəmiyyətdə narahatlıq doğuran bütün məsələləri izah etməyə hazırdır.
Rüfət Sultan
Ən son xəbərləri və yenilikləri almaq üçün ain.az saytını izləyin.
