Baku.ws saytına istinadən ain.az xəbər verir.
32 ildən sonra Bakı-Ağdam sərnişin qatarının hərəkətə başlaması bir çoxları üçün unudulmaz gün oldu. Bu tarixi səfərdə iştirak edənlərdən biri də ehtiyatda olan polkovnik-leytenant, baş komandonun əsgəri Zahid Qarayev idi.
O, BAKU.WS-ə açıqlamasında duyğularını bölüşüb:
"Mən çox sevinirəm ki, Ağdama 32 ildən sonra bir daha qatarla gedirəm. Yanımdakılar da komandirimin - Allahverdi Bağırovun övladlarıdır. O mənim komandirim olub. Biz Bakıya gələndə Allahverdi Bağırovun övladları azyaşlı idilər".
O, keçmişi xatırlayaraq indiki hisslərini belə ifadə edib:
"O müharibəni görmüş insan hazırki vəziyyətdə çox fərqli təəssüratlar keçirirlər. Elə bilirəm ki, yuxudayam. Mən özümə söz vermişdim ki, bütün Qarabağda tikinti bərpa işləri yekunlaşdıqdan sonra, ora bu səfər bütün medallarımla gedəcəyəm. O zamana qədər heç bir medalımı taxmayacağam".
Qarayev unudulmaz bir xatirəsini də bölüşüb:
"Mənim bir arzum da var idi. Deməli, o vaxt Şəkidə 15 bayrağımızı hazırlamışdıq. Hansı ki, Ulu öndər Heydər Əliyevə də o bayraqlardan birini göndərmişdik. O bayraqlardan biri məndə qalmışdı. Axırıncı səfər Qarabağa gedəndə onu da özümlə aparmışdım. Ona görə də sizə təşəkkür edirəm ki, məni gəlib tapdınız".
Polkovnik-leytenant həmin səfərdə yaşadığı həyəcanı belə ifadə edib:
"Məndən soruşursunuz ki, necə təəssürat keçirirsən? Necə olaram?. Bu gün 30 ildən çoxdur görmədiyim adamları görmüşəm. Bu qədər müddət keçməsinə baxmayaraq biz hələ də bir-birimizi tanıyırıq".
O, minnətdarlığını da çatdırıb:
"Ulu öndərimizə, Ali Baş Komandanımıza, şəhidlərimizə, qazilərimizə minnətdarıq. Biz diri şəhidlərik, ancaq hər iki Qarabağ müharibəsində ölənlər isə yoxdular - ölü şəhidlərdir… Heç vaxt demək lazım deyil ki, mən belə etmişəm. Çünki biz belə etmişik".
Sonda Zahid Qarayev Heydər Əliyevlə olan unudulmaz söhbətini də yada salıb:
"Ulu öndər Heydər Əliyev Naxçıvanda məndən soruşdu ki, haralısan? Dedim, azərbaycanlı. Yenə sualı təkrar etdi ki, haralısan? Yenə dedim, azərbaycanlı. Bu səfər soruşdu ki, hansı regiondansan? Dedim ki, torpağın o başı, bu başı olmaz... Biz hamımız azərbaycanlıyıq".
Şahanə Xankişiyeva
Daha ətraflı məlumat və yeniliklər üçün ain.az saytını izləyin.
