Çinin elektromobil istehsalçısı BYD-nin sürətli artım dövrü başa çatmaq üzrədir.
Redaktor.az xəbər verir ki, bu haqda Reuters məlumat yayıb.
Şirkət 2025-ci il üçün satış hədəfini dərhal 16 faiz azaldaraq 4,6 milyon avtomobilə endirib. Halbuki mart ayında BYD 5,5 milyon avtomobil satmağı planlaşdırdığını açıqlamışdı.
Bundan əlavə, şirkətin səhmlərinin dəyəri düşüb. Mütəxəssislər bunu Geely Auto və Leapmotor kimi rəqiblərin artan təzyiqi ilə izah edirlər. Ötən həftə BYD son üç ildən artıq müddətdə ilk dəfə olaraq rüblük mənfəətində 30 faizlik azalma olduğunu açıqlayıb.
Məlumata görə, proqnozun aşağı salınması həm də Çin iqtisadiyyatında müşahidə olunan deflyasiya təzyiqini əks etdirir. Uzunmüddətli mənzil bazarı böhranı daxili tələbi ciddi şəkildə zəiflədir.
Qeyd olunur ki, bu ilin ilk səkkiz ayında BYD 5,5 milyon avtomobillik ilkin satış hədəfinin yalnız 52 faizini yerinə yetirə bilib.
Aytəkin TOFİQQIZI
