Avtomobil sahibləri arasında “vurub qaçma” hadisələri gündəlik problem olaraq qalır və bu hallarda sığorta ödənişləri məsələsi tez-tez mübahisələrə səbəb olur.
AzPost bildirir ki, qanunvericiliyə görə, kasko sığorta müqaviləsi ilə təmin olunmuş avtomobil zədələndikdə ödəniş sığortaçı tərəfindən həyata keçirilməlidir.
“Sığorta fəaliyyəti haqqında” Qanuna əsasən, avtomobil sahibi hadisəni dərhal sığorta şirkətinə bildirməli, zəruri sənədləri təqdim etməli və hadisəni təsdiq edən sübutları – registrator görüntüləri, şahid ifadələri və digər materialları təqdim etməlidir. Hüquqşünaslar vurğulayır ki, vurub qaçan sürücünün tapılmaması sığortaçı üçün ödənişdən yayınmaq üçün əsas ola bilməz.
Ekspertlər vətəndaşlara tövsiyə edirlər ki, sığorta müqavilələrini diqqətlə oxusun, hər hadisə zamanı bütün sübutları toplayıb rəsmi şəkildə şirkətə təqdim etsin və ödənişin qanun çərçivəsində həyata keçirilməsini tələb etsin.
Qanuna uyğun olaraq, ödənişin ləngidilməsi və ya əlavə şərtlərin irəli sürülməsi müştərinin hüquqlarının pozulması hesab olunur və zərərçəkən müvafiq qanuni yollara müraciət edə bilər.
