Rusiya Federal Statistika Xidməti (Rosstat) son bir ildə ölkə üzrə yoxsulluğun səviyyəsinin 8,5 faizdən 7,4 faizə düşdüyünü açıqlayıb.
Hafta.az-ın yazdığına görə, buna baxmayaraq, 10,8 milyon insan hələ də yaşayış minimumundan aşağı gəlirlə yaşayır. Xüsusilə, Rusiyanın regionlarında yoxsulluğun səviyyəsi yeddi dəfəyə qədər dəyişir. Məsələn, İnquşetiyada əhalinin dörddə birindən çoxu yaşayış minimumundan aşağı səviyyədə yaşayır. Buryatiyada hər altı nəfərdən biri, Tuvada isə beş nəfərdən biri yoxsulluq həddinin altındadır.
Rosstat-ın məlumatına görə, 2025-ci ilin ikinci rübündə yaşayış minimumundan aşağı yaşayan insanların sayı ötən ilin eyni dövrü ilə müqayisədə 12,4 milyondan 10,8 milyona qədər azalıb. Bu, sosial vəziyyətin düzəlməsi deyil, insanların çörəkpulu qazanmaq üçün mərkəzi rus şəhərlərinə köçməsi ilə əlaqədardır. Yoxsulluq həddi 16863 rubl müəyyən edilib. Yoxsulluq səviyyəsi ilin birinci rübündə ən yüksək həddə çatır və sonuncu rübdə ən aşağı səviyyəyə enir.
Rusiyada rəsmi yoxsulluq səviyyəsi ilə özünü kasıb hesab edən vətəndaşların nisbəti arasında üç dəfə fərq var. Son sosioloji sorğulara görə, rusların təxminən 22 faizi özünü yoxsul hesab edir. Bu fərq yaşayış minimumunun müəyyən edilmə üsulu və bölgələr üzrə əlavə edilən əlavə ödənişlərlə bağlıdır.
Rosstat-ın 2025-ci ilin iyul ayında dərc etdiyi məlumatlar Rusiyada yoxsulluq səviyyəsinin regional bölgüsünü ortaya qoyur. Yoxsulluq səviyyəsi ən aşağı Yamalo-Nenets Muxtar Dairəsində və Sankt-Peterburqda 3,5 faiz, Moskvada isə 4,1 faiz təşkil edir. Rusiya üzrə orta yoxsulluq səviyyəsi 7,2 faiz olduğu halda, yoxsulluq səviyyəsi Kalmıkiyada (13,2 faiz), İnquşetiyada (25,6 faiz), Çeçenistanda (15,2 faiz), Qaraçay-Çərkəzdə (17,2 faiz), Maridə (12,6 faiz), Tuvada (20,4 faiz), Xakasiyada (13,8 faiz), Buryatiyada (15,9 faiz) və Yəhudi Muxtar Vilayətində (13,7 faiz) orta səviyyədən yüksəkdir.
Rusiya şəhərlərində yoxsulluq səviyyəsi 3,3 faiz olduğu halda, kənd yerlərində 10,5 faizə yüksəlir. 18 yaşadək uşaqlar arasında yoxsulluq səviyyəsi Rusiyadakı orta göstəricidən 10,8 faiz yuxarıdır.
