ain.az, Bizimyol portalından verilən məlumatlara əsaslanaraq xəbər verir.
Bir vaxtlar dünyanın ən böyük duz göllərindən biri olan Urmiya gölü indi xəritədən silinmək təhlükəsi ilə üz-üzədir. İran mediasında yayılan peyk görüntüləri təsdiqləyir ki, göl artıq tamamilə quruyub.
Urmiya gölü 2003-cü ildən etibarən davam edən quraqlıq, iqlim dəyişikliyi və düzgün idarə olunmayan su siyasəti nəticəsində tədricən kiçilməyə başlamışdı. On illərlə bölgəyə həyat verən bu təbii su hövzəsinin yox olması həm ekosistem, həm də yerli əhali üçün böyük faciədir.
Nəhəng layihə, nəticəsiz səy
İran hökuməti gölü xilas etmək üçün 6 milyard dollarlıq bərpa layihəsi elan etsə də, gözlənilən nəticə əldə edilməyib. Quraqlıq davam edir, su ehtiyatları azalır, insan faktorunun yaratdığı problemlər isə vəziyyəti daha da ağırlaşdırır. Suvarma üçün gölə axan çayların istiqamətinin dəyişdirilməsi və ətraf ərazilərdə nəzarətsiz kənd təsərrüfatı fəaliyyəti gölün sonunu sürətləndirən əsas səbəblərdəndir.
Ekoloji və sosial fəsadlar
Urmiya gölünün quruması regionda toz və duz fırtınalarının artmasına, kənd təsərrüfatı torpaqlarının sıradan çıxmasına səbəb olur. Minlərlə insanın sağlamlığı təhlükə altına düşür, əkin sahələri məhsuldarlığını itirir. Bu isə həm sosial, həm də iqtisadi böhranı dərinləşdirir.
Gələcək nəsillərə hansı miras qalır?
Urmiya gölünün yox olması yalnız İranın deyil, bütün regionun faciəsidir. Bu təbii möcüzə gələcək nəsillərə miras qala biləcək ən dəyərli sərvətlərdən biri idi. İndi isə o, insanın təbiətə biganəliyinin canlı nümunəsinə çevrilib.
Əgər təcili və real tədbirlər görülməzsə, Urmiya gölü əfsanəyə çevriləcək, geridə isə yalnız xatirələr və duzla örtülmüş çöllər qalacaq.
Leyla Mirzə, Bizimyol.info
Daha ətraflı məlumat və yeniliklər üçün ain.az saytını izləyin.
