Təxminən 1 ay öncə okeanın o tayında, Vaşinqtonda tarixi bir görüş oldu. Avqustun 8-də Azərbaycan Respublikasının Prezidenti İlham Əliyev, Amerika Birləşmiş Ştatlarının Prezidenti Donald Tramp və Ermənistan Respublikasının Baş naziri Nikol Paşinyan arasında görüş oldu. Həmin görüşdə tərəflər Birgə Bəyannamə imzaladılar. Həmçinin həmin görüş çərçivəsində elə həmin tarixdə Azərbaycanın xarici işlər naziri Ceyhun Bayramov və Ermənistanın xarici işlər naziri Ararat Mirzoyan “Azərbaycan Respublikası və Ermənistan Respublikası arasında sülhün və dövlətlərarası münasibətlərin təsis edilməsinə dair Saziş” layihəsini parafladılar və nazirlərin ATƏT-in fəaliyyətdə olan sədrinə birgə müraciətini (ATƏT-in Minsk Prosesinin, ATƏT-in fəaliyyətdə olan sədrinin Minsk konfransının müzakirəsində olan münaqişə üzrə şəxsi nümayəndəsi və Yüksək Səviyyəli Planlaşdırma Qrupunun bağlanması barədə) imzaladılar. Həmin tarixi günlə bağlı Azərbaycanın siyasi şərhçilərinin fikirləri bəllidir. Bəs, bu tarixi görüş okeanın o tayından necə görünür? Ümumiyyətlə, son proseslər türk dünyası üçün nələr vəd edir? Amerika Birləşmiş Ştatlarında yaşayan diaspor fəalı, siyasi şərhçi Zaur Bayramlının BAYRAQDAR MEDİA-ya özəl müsahibəsində bu və digər suallara cavab tapmağa çalışdıq.
