ABŞ-nin "USS Nimitz" təyyarədaşıyan gəmisi İran yaxınlığındakı Fars körfəzində fəaliyyətini davam etdirir.
Teleqraf xəbər verir ki, ABŞ-nin Səudiyyə Ərəbistanındakı səfirliyi gəminin yeni görüntülərini paylaşıb.
“USS Nimitz” təyyarədaşıyan gəmisinin Fars körfəzində olması ABŞ Hərbi Dəniz Qüvvələrinin regional dəniz təhlükəsizliyi və sabitliyinə sadiqliyini nümayiş etdirir”, - ABŞ-ın Səudiyyə Ərəbistanındakı səfirliyi özünün X sosial media səhifəsində bildirib.
Bu açıqlama İsrailin çərşənbə axşamı Qətərdə HƏMAS liderlərinə zərbələr endirməsinin ardınca verilib. Nimitz iyun ayında Yaxın Şərqə yenidən yerləşdirilib və İranla münaqişədən sonra Oman körfəzində fəaliyyət göstərir. ABŞ bölgədə davam edən gərginlik fonunda regionda döyüş hazırlığını artırıb.
İranın nüvə proqramının gələcəyi ilə bağlı qeyri-müəyyənlik fonunda ABŞ prezidenti Donald Tramp razılaşma əldə olunmasa, yenidən zərbə endirməklə hədələyib və ABŞ-nin İranın nüvə silahı əldə etməsinə icazə verməyəcəyini bəyan edib.
ABŞ Mərkəzi Komandanlığının (CENTCOM) məlumatına görə, Nimitz və onun zərbə qrupu, o cümlədən 17-ci Təyyarə Daşıyan Hücum Qrupu və iki esmines avqust ayında Bəhreyndə olub.
