Premyer Liqanın 4-cü turunda maraqlı olay yaşanacaq.
İki bölgə təmsilçisi – “Turan Tovuz”la “Qəbələ” bölgədə yox, Bakıda üz-üzə gələcək.
“İmişli” və “Neftçi” üzərindəki qələbələrlə 6 xal toplayan tovuzlulardan fərqli olaraq qəbələlilərin aktivində “Karvan-Yevlax”la qarşılaşmada əldə olunan 1 xal var.
Məhz bu məqam Kaxaber Tsxadadzenin çalışdırdığı kollektivi ilk qalibiyyətə səsləyəcək. “Turan Tovuz” da boş dayanmaq fikrində deyil.
Elitaya qayıdan rəqiblə nominal meydan sahibi olacağı dueldə növbəti 3 xalını qazanmaq istəyəcək.
Sportinfo.az-a danışan “qırmızı-qaralar”ın braziliyalı müdafiəçisi Eduardo Kunde komandasının iddiasını gizlətməyib:
“Çox yaxşı komandaya sahibik. İlk oyunda diqqətsizlik səbəbindən uduzduq. Sonrakı iki görüşdə güclü rəqiblərlə başa-baş mübarizə apardıq. Hətta məğlub olmaya bilərdik. Təəssüf ki, təcrübəsizlik özünü göstərdi.
Oyundan-oyuna komandanın çıxışında irəliləyiş hiss olunmaqdadır. Problemləri görürük və onları aradan qaldırmaq yönündə çalışırıq.
Ümid edir və inanıram ki, növbəti matçda ilk qələbəmizi qazanacağıq. Meydana 3 xal üçün çıxacağıq. Bunu bacarsaq, davamı mütləq gələcək”.
Sentyabrın 13-də “Azersun Arena”da keçiriləcək oyun saat 19:00-da başlayacaq.
HƏBİB
