Ankara, 17 sentyabr, AZƏRTAC
Türkiyənin maliyyə və xəzinə naziri Mehmet Şimşek NATO ölkələrinin müdafiə xərclərini artırmaq qərarını “ölkənin hərbi-sənaye kompleksi üçün böyük fürsət” adlandırıb.
AZƏRTAC xəbər verir ki, yerli televiziya kanallarının birində çıxış edən maliyyə naziri 2030-cu ilə qədər qlobal hərbi xərclərin hazırkı 2,7 trilyon dollardan 6 trilyon dollara qalxacağı ilə bağlı ekspert hesablamalarına diqqət çəkib.
“Hazırda Türkiyədə 1400-ə qədər müdafiə layihəsi həyata keçirilir. Ölkəmizin ilin sonuna qədər dünyanın ən çox silah ixrac edən 10 ölkəsi arasında yer alması gözlənilir”, -deyə Şimşək bildirib.
Türkiyəli nazir ticarət müharibələrinin ölkə iqtisadiyyatına mənfi təsirindən də danışıb. “Bölgədə və qlobal miqyasda ticarət müharibələri Türkiyəyə qismən mənfi təsir göstərir”, - deyən M.Şimşek xarici faktorların hökumətin Türkiyənin Ortamüddətli İqtisadi Proqramını həyata keçirmək öhdəliyinə təsir etmədiyini vurğulayıb.
O əlavə edib: “Ölkədə makroiqtisadi sabitliyin güclənməsi ilə Türkiyə investorlar üçün getdikcə daha cəlbedici olur”.
AZƏRTAC-ın xüsusi müxbiri
Ankara
