Müəllif:Mehin Qasımova,Banco.az
Çinin Kiberməkan İdarəsi (CAC) ölkənin ən böyük texnoloji şirkətlərinə ABŞ-ın çip istehsalçısı Nvidia-dan bütün süni intellekt çiplərini almağı dayandırmağı və mövcud sifarişləri dayandırmağı tövsiyə edib
Banco.az xəbər verir ki, bu barədə Financial Times (FT) xəbər verib.
Məlumata görə, CAC şirkətlərə həm mövcud sifarişləri ləğv etməyi, həm də yeni alışlardan çəkinməyi tövsiyə edib.
Bu həftə "ByteDance" və "Alibaba" kimi nəhənglərə RTX Pro 6000D qrafik kartlarının alışını dayandırmaq barədə göstəriş göndərilib.
Bəzi şirkətlər isə göstəriş verilməzdən əvvəl on minlərlə RTX Pro 6000D sifariş etmək niyyətində olduqlarını bildiriblər. Bu, Nvidia-nı təchizatçılar vasitəsilə sınaq və yoxlama işlərini sürətləndirməyə məcbur edib.
Hesabatda qeyd olunur ki, Çin hökuməti eyni zamanda "Huawei" və "Cambricon" kimi yerli çip istehsalçılarını, eləcə də öz yarımkeçirici istehsalını inkişaf etdirən "Baidu" və "Alibaba" şirkətlərini məhsullarının "Nvidia" çipləri ilə müqayisəli təhlilini təqdim etməyə çağırıb.
