Alimlər Litvanın paytaxtı Vilnüsdə Napoleon ordusuna məxsus kütləvi məzarlıqda cəsədləri tapılan 13 əsgərin dişlərinin DNT-sini analiz edərək iki növ təhlükəli bakteriya aşkar ediblər.
Bu barədə İspaniyanın ABC qəzeti yazır.
Məlumata görə, bu bakteriyalar 1812-ci il hərbi kampaniyasının bir çox iştirakçısının ölümünə səbəb olub.
Müayinə edilən meyitlərin hər birində "Borrelia recurrentis" və "Salmonella enterica paratyphi C" aşkar edilib. Bu bakteriyalar bitlər və digər parazitlər vasitəsilə ötürülür.
Qeyd edilir ki, Napoleon müharibələri ilə bağlı tarixi mənbələrdə tif xəstəliyindən bəhs edilmir, lakin tədqiqatçılar qeyri-spesifik və müxtəlif simptomlara görə bunun diqqətdən kənarda qalmış ola biləcəyini düşünürlər. /Oxu.az/
