Ukrayna müdafiə qüvvələri Donbasın Dobropolye istiqamətində hücum əməliyyatlarını davam etdirir. Ukrayna hərbçiləri addım-addım irəliləyirlər, deyə Ukrayna Silahlı Qüvvələrinin Baş Komandanı Aleksandr Sırski məlumat verib.
Onun sözlərinə görə, son 24 saat ərzində Ukrayna hərbi birləşmələri 1,3 km² sahəni azad edib, həmçinin Donetsk vilayətinin Pokrovsk rayonu ərazisində 2,1 km² sahəni təmizləyərək Rusiya qoşunlarını məhv edib. Bəzi istiqamətlərdə hücum qrupları 200 metrdən 2,5 kilometrə qədər irəliləyib.
Sırskinin məlumatına görə, 22 sentyabr 2025-ci il saat 00:00 vəziyyətinə görə, Ukrayna qüvvələri ümumilikdə 164,5 km² ərazini azad edib, əlavə olaraq 180,8 km² sahə isə Rusiya xüsusi təyinatlılarının kəşfiyyat-diversiya qruplarından təmizlənib. Həmçinin yeddi yaşayış məntəqəsi azad edilib, doqquz yaşayış məntəqəsi isə tamamilə DQG-lərdən təmizlənib.
