Yaponiyanın Aichi prefekturasında yerləşən Toyoake bələdiyyəsi iş və məktəbdən sonra qalan vaxtlarda smartfon və video oyun konsolları daxil olmaqla rəqəmsal cihazların istifadəsini gündə iki saatla məhdudlaşdırmağı tövsiyə edən qaydanı təsdiqləyib.
Kyodo agentliyinin xəbərinə görə, Toyoake bələdiyyəsi şəhər sakinlərinin texnoloji cihaz istifadəsini məhdudlaşdırmaları üçün bu addımı atıb.
Bələdiyyə başçısı Kouki Masafumi şəhər şurasında təsdiqlənən qayda ilə smartfon istifadəsi üçün zaman məhdudiyyətinin Səhiyyə, Əmək və Sosial Rifah Nazirliyinin sağlam yuxu üzrə təlimatlarına uyğun olaraq tənzimləndiyini və həftə içi orta istifadənin gündə iki saat olaraq müəyyən edildiyini açıqlayıb.
Qayda 18 yaşdan aşağı uşaqlar üçün kifayət qədər yuxunun fiziki və zehni inkişaf baxımından vacib olduğunu vurğulayır. Əsas məktəb şagirdlərinə axşam saat 21:00-dan, orta məktəb yaşındakılara və daha böyüklərə isə 22:00-dan sonra smartfon istifadə etməmələri tövsiyə olunur.
Valideynlərə cihaz istifadəsi üçün ev qaydaları müəyyən etmələri tövsiyə edilir və şəhər idarəsi də valideynlər üçün məsləhət xidmətləri təqdim edəcək sistem quracağına söz verir.
1 oktyabrda qüvvəyə minməsi planlaşdırılan qaydada tövsiyələrə əməl etməyənlər üçün hər hansı cəza tətbiq olunmayacaq.
Qayda Yaponiya üçün texnoloji cihazların həddindən artıq istifadəsinin yuxu və ailə həyatına mənfi təsirlərinə diqqət çəkən ilk tətbiq xarakteri daşıyır.
