“Kəpəz”, “Araz-Naxçıvan”, “Turan Tovuz” və “Neftçi”nin intizam sanksiyası ilə üzləşmədiyini nəzərə alsaq, qalan 8 komandanın futbolçularına 19 sarı, 1 qırmızı vərəqə göstərildi. Yəni oyunların ümumilikdə səliqəli keçdiyini demək çətindi.
İdarəçiliklə bağlı digər qərarlara gəlincə, İnqilab Məmmədov narazılığa səbəbkar oldu.
Qarabağ – Zirə, RƏŞAD ƏHMƏDOV
Hər şey əvvəlcədən bəlli idi: Lissabona yollanmağa hazırlaşan “Qarabağ”ın xal itirməsi sürpriz sayılmayacaqdısa, “Zirə” bunun üçün çox çalışmalıydı. Bu baxımdan hadisələrin axarı heç kimi təəccübləndirmədi. Rəşad Əhmədovun xırda follara göz yumması, oyunun tepminin düşməməsi üçün hər iki tərəfə xeyli güzəşt etməsi dinamik matç izləməyimizə səbəb oldu. Ədalət təmsilçisi yalnız 39-cu dəqiqədə sərt üzünü göstərdi. Axı həqiqətən də, Mmaenin Papunaşvilini kobud müdaxiləylə yerə sərməsinini penaltidən başqa cəzası yox idi! Rəsmi xəbərdarlıqlar isə 2-ci hissəyə təsadüf etdi. Bu da səbəbsiz deyil. Meydan shibləri hesabı bərabərləşdirməyə, qonaqlar isə qələbəni qorumağa çalışırdı ki, belədə qayda pozuntuları qaçılmaz idi. Hər halda, mingəçevirli hakim işinin öhdəsindən gəldi: nə hansısa etiraza səbəb oldu, nə də səhvlə yadda qaldı.
Turan Tovuz – Qəbələ, CAVİD CƏLİLOV
Heç şübhəsiz,bölgə təmsilçilərinin dueli Cavid Cəlilovun karyerasının ən asan sınaqları siyahısına düşdü. Hər iki tərəfin ehtiyatlı oyunu, qayda pozuntusuna yol verməmək üçün əlindən gələni etməsi ədalət təmsilçisi üçün hansısa çətinliyin yaranmamasına gətirib-çıxardı. Çox güman, bunda matçın “Azərsun Arena”da keçirilməsinin də payı var. Axı belədə tovuzlu azarkeşlərin öyrəşdiyimiz təzyiqi xeyli azalıb... Həmçinin Cavid Cəlilov yalnız Kundeyə “sarı” göstərdi. Niyə? Çünki ardıcıl kobudluq edən futbolçunun Souzanı da yerə sərməsi referinin səbr kasasını daşırdı. Qısası, Cəlilov da müzakirə doğuracaq qərar müəllifi olmadı.
Kəpəz - Araz-Naxçıvan, RAUF CABBAROV
Turun açılış oyununu Rauf Cabbarov idarə etdi. Elə də sürətli olmayan, qarşılıqlı hücumların az olduğu oyunu idarə etmək onun üçün çətin deyildi. Sərt oyuna üstünlük verən referi səviyyəsini ortaya qoydu. Sarı vərəqənin olmaması da keyfiyyətdən xəbər verən amillərdəndi. Ümumilikdə bəlkə də turun ən yaxşı idarəçiliyini gördük. Oyunun nəticəsinə təsir edən hansısa səhvə yol vermədi.
İmişli - Sumqayıt, TURAL QURBANOV
Qazon üzündən oyunun keyfiyyəti çox bərbad idi. Belə oyunları idarə etmək isə hakimlər üçün çox ağır olur. Ağır olduğu qədər də asan. Çünki temp aşağı idi. Tural Qurbanov və briqadası bu sınaqdan üzüağ çıxa bildi. Verilən qərarlara heç kimin şübhəsi olmadı - Vieqasdan başqa. Onun sondakı kobudluğu birbaşa qırmızı vərəqə kimi dəyərləndirildi. Doğru qərar idi. Ümumilikdə keyfiyyətsiz oyun fonunda yaxşı idarəçilik görə bildik.
Neftçi - Sabah, İNQİLAB MƏMMƏDOV
Təzadla dolu idarəçilik. Xırda follarda dəfələrlə verilən yanlış qərarlar, oyunun tempinu öldürmək… Birinci hissəyə ən azı 4 dəqiqə artırılmalı olduğu halda, referi 2 dəqiqi ilə kifayətləndi. Maraqlıdı ki, oyunda 3 sarı vərəqə var, burda “Neftçi” futbolçularının adı yoxdu. Penalti epizodu isə təzaddan təzad… Futbol ictimaiyyətinin 80 faizi penalti olduğunu deyir. Böyük ehtimalla penalti var, amma verilməməsini də doğru saymaq olar. Yekun qərarı Hakimlər Komitəsinin sədri Frank De Blekeri versəydi, yaxşı olardı. Amma nəyə görəsə ötən mövsümün sonlarından bəri görünmür…
Şamaxı – Karvan-Yevlax, FƏRİD HACIYEV
Elə də sürətli keçməyən oyunu idarə etmək hakimlər briqadası üçün də çətin olmadı. Komandalar kobudluğa çox meyl etmirdilər. Xırda nüanslar olmasaydı, Ayxan Abbasov da Fərid Hacıyevin və onun briqadasının idarəçiliyindən razı qalardı. Ayxan bəyin əsas narazılığı 41-ci dəqiqədə sürətli hücumun hakimin fitiylə yarıda kəsilməsi oldu. “Şamaxı” “üstünlük” prinsipinə əməl olunmamasından narazı qaldı. Ümumilikdə hakimlərin işinə yaxşı qiymət vermək olar. Hər halda, meydan sahibləri də böyükhesablı qələbə qazanıb, deməli, hakimlərdən narazılıq etmək üçün əsas yoxdu.
