Xalq qazeti saytından əldə olunan məlumata görə, ain.az məlumat yayır.
Görkəmıli dövlət xadimi, keçmiş SSRİ-nin “Fəxri çekist”i, uzun illər Dövlət Təhlükəsizlik Orqanlarında xidmət edən, polkovnik Rzaqulu Hüseyn oğlu Quliyevin 110 illik yubileyi münasibətilə DTX-nın Mədəniyyət Mərkəzində anım mərasimi keçirilmişdir. Tədbirdə mərhum kəşfiyyatçının həmkarları, ailə üzvləri, ziyalılar, millət vəkilləri, ictimai təşkilatların nümayəndələri iştirak etmişlər.
Anım mərasimini “Alyans” Azərbaycan Xüsusi Xidmət Orqanları İctimai Birliyinin sədri Fəxri Abbasov açaraq Rzaqulu Quliyevin 110 illik yubileyi münasibətilə ürək sözlərini bildirmiş, sözü mərhum kəşfiyyatçı ilə bağlı xatirələrini yada salan qonaqlara, Rzaqulu Hüseynovla birgə işləmiş veteran həmkarlarına vermişdir.
Məşhur kəşfiyyatçının iş yoldaşları olmuş DTX-nın fəxri əməkdaşları Şamil Süleymanov, Arif Zeynalov, general Fəxrəddin Təhməzov Rzaqulu Quliyevin peşəkarlığından, milli mənafeyimizi hər şeydən üstün tutmasından və DTX zabiti kimi insani keyfiyyətlərindən, zabit adının müqəddəsliyini əməlləri, geniş fəaliyyəti ilə hər şeydən üstün tutmasından söhbət açmışlar.
Yazışı, jurnalist Elmira Axundova görkəmli şəxsiyyət Rzaqulu Quliyevlə bağlı araşdırmalarından maraqlı faktları mərasim iştirakçılarının diqqətinə çatdırmış, ümummilli lider Heydər Əliyev haqqında yazdığı kitablarda bu məşhur kəşfiyyatçı ilə onun əbədiyaşar dostluğundan yazdıqları barədə danışmışdır.
Anım mərasimində Milli Məclisin Müdafiə, Təhlükəsizlik və korrupsiyaya qarşı mübarizə Komitəsinin sədri, deputat Arzu Nağıyev DTX sıralarında fədakarlıqla, vətəndaş mövqeyi ilə xidmət etmiş mərhum Rzaqulu Quliyevin 110 illik yubileyi münasibətilə rəhbərlik etdiyi komitə adından çıxış edərək, mərhumun qızı Zərifə Quliyevaya diplom təqdim etmişdir.
“Alyans” Azərbaycan Xüsusi Xidmət Orqanları Veteranlarının İctimai Birliyinin təsis etdiyi “Mehdi Hüseynzadə” yubiley medalı Rzaqulu Quliyevin davamçısı, nəvəsi Fərid Quliyevə və mərhumun qızı Zərifə Quliyevaya təqdim olunmuşdur.
Anım toplantısının sonunda Rzaqulu Hüseyn oğlu Quliyevin ömür yoluna, həyat mövqeyinə həsr olunmuş “Mahir kəşfiyyatçı, vətəndaş, ata...” adlı sənədli televiziya filminin nümayişi olmuşdur.
Rzaqulu Quliyevin qızı Zərifə Quliyeva atasının xatirəsini əziz tutan DTX rəhbərliyinə, toplantıda iştirak edən ziyalılara, ictimayyətin nümayəndələrinə ailəsi adından dərin minnətdarlığını bildirmişdir.
Kəmalə ABDİNOVA
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
