Türkiyə Prezidenti Rəcəb Tayyib Ərdoğan Birləşmiş Millətlər Təşkilatının mənzil-qərargahında İqlim Sammitində çıxış edib. Məlumatı “Anadolu” verib.
O deyib: “Tətbiq olunan iqtisadi tədbirlərin köməyi ilə biz 2035-ci ilə qədər emissiyaları 466 milyon ton azaltmağı və onların səviyyəsini 643 milyon tona endirməyi planlaşdırırıq”.
İyul ayında qəbul edilən İqlim Qanununun 2053-cü ilə qədər xalis sıfır emissiya hədəfinə nail olmaq üçün mühüm addım olduğunu qeyd edən Ərdoğan, emissiya ticarəti sisteminin qurulması, yaşıl maliyyə strategiyasının həyata keçirilməsi və milli yaşıl taksonomiyanın formalaşdırılması istiqamətində davam edən səyləri qeyd edib.
Prezident bildirib ki, iqlim siyasəti yeddi sütun üzərində qurulur: enerji, sənaye, binalar, nəqliyyat, tullantılar, kənd təsərrüfatı və meşə təsərrüfatı.
Onun sözlərinə görə, bərpa olunan enerjinin payını və enerji səmərəliliyini artırarkən sənayedə aşağı karbon texnologiyaları geniş şəkildə tətbiq edilir: “İndi biz ümumi quraşdırılmış gücümüzdə bərpa olunan enerjinin payını 60%-dən çox artırmışıq. İnfrastrukturumuzu, xüsusən də elektrik avtomobillərinin istehsalını sürətlə gücləndiririk və dəmir yolu infrastrukturuna sərmayələri prioritetləşdiririk”.
P.ƏMİRCANOV
XQ
