Fermentləşdirilmiş ədviyyatlı kələmdən hazırlanan ənənəvi Koreya yeməyi kimchi, oruc qan şəkərini və qan təzyiqini aşağı sala bilər.
E-saglam.az xəbər verir ki, Konnektikut Universitetinin alimləri bu nəticəyə doqquz klinik sınağın təhlilindən sonra gəliblər. Araşdırmanın nəticələri Nutrition Reviews jurnalında dərc olunub.
Məlum olub ki, müntəzəm olaraq pəhrizinə ədviyyatlı kələm daxil edən insanların nəzarət qrupuna nisbətən:
oruc qlükoza səviyyəsi orta hesabla 1.93 mq/dL daha aşağıdır;
qanda trigliseridlərin (yağ molekulları) miqdarı 28.88 mq/dL azdır;
qan təzyiqi isə 3.48 mm Hg (sistolik) və 2.68 mm Hg (diastolik) aşağı olur.
Tədqiqat müəlliflərinin sözlərinə görə, bu dəyişikliklər diabet və ürək-damar xəstəliklərinin qarşısının alınmasında mühüm əhəmiyyət daşıyır.
Alimlər qeyd edirlər ki, ədviyyatlı kələmin yüksək duz tərkibinə baxmayaraq, təsir yenə də müsbət olub. Adətən, həddindən artıq natrium qəbulu yüksək qan təzyiqinə səbəb olur. Lakin fermentasiya prosesi zamanı yaranan probiotiklər duzun bəzi mənfi təsirlərini neytrallaşdıra bilər.
Tərcümə: Nəzrin Abbas
E-saglam.az
